اسلام آباد۔ 13 ستمبر (اے پی پی) چیئرمین سینیٹ محمد صادق سنجرانی لیبیا ٹی نوکاپ اٹی مروک آ جانی و مالی نسخان تیا ڈکھیائی و است ہسونی نا درشانی ءِ کرینے۔ چارشنبے نادے آ سینیٹ سیکرٹریٹ نا کنڈآن جاری بیان نا رداٹ چیئرمین سینیٹ پارے کہ مصیبت نا داساہت اٹی پاکستان نا الس و حکومت تینا لیبیا نا ایلم تتون تفوک ءُ۔ اواللہ تعالیٰ آن دعاکرے کہ داوڑنا ناگہانی آفت آن غٹ ءِ رکھے۔ اونوکاپ اٹی زوال کروک آ بندغ آتا درجہ غاتا بڑزی و خاہوت نا صبر وجمیل کن اللہ تعالیٰ آن دعاہم کرے۔ محمد صادق سنجرانی مستی پارے کہ لیبیا نا بہادر الس تینا روایتی عزم و سگ اٹ دا ناگہانی آفت نا مقابلہ ءِ کیرہ، پاکستانی قوم انا دعاک لیبیانا الس و حکومت تون ءُ۔ اوپارے کہ چاگڑدی بدلی تا سوب آن اقوام عالم ءِ ویل مون تروک ءِ، پاکستان ہم دانا گواچی ءِ۔ چیئرمین سینیٹ چاگڑدی بدلی تا اثرآتے کم کننگ کن جہانی کہول آ بین الریاستی کمکاری ءِ اہم گوندا۔ ڈپٹی چیئرمین سینیٹ مرزامحمد آفریدی، سینیٹ اٹی قائد ایوان سینیٹر اسحاق ڈار، قائد حزب اکتلاف سینیٹر ڈاکٹر شہزاد وسیم ئسک ہم لیبیا ٹی نوکاپ اٹی مروک آ جانی و مالی نسخان تیا ڈکھیائی وا ست ہسونی نا درشانی ءِ کرینو۔ اوفک نوکاپ نا سوب آن لیبیا ٹی زوال کروک آ بندغ آتا درجہ غاتا بڑزی و ٹھپی تا زوت دراخ جوڑی کن دعا کرے۔ اومستی پارے کہ پاکستانی قوم انا است لیبیا نا الس تون دھڑکک۔ ڈکھیائی نا داساہت اٹی لیبیا نا الس تون تفوک اُن۔
