اسلام آباد۔ 12 ستمبر (اے پی پی) نگراں بنجائی وزیر ڈٹ بندی شونداری و خصوصی گام گیج محمد سمیع سعید تون پاکستان اٹی آذربائیجان نا سفیر خضر فرہادوف سے شنبے نادے آداڑے اوڑدہی کرے۔ اوڑدہی ٹی آذربائیجان نا ڈپٹی ہیڈ آف مشن تیمرلان خلیلوف، چیف انٹرنیشنل ٹریڈ اینڈ فنانس، چیف فارن ایڈو وزارت ڈٹ بندی نا ایلو بڑزکو کمامدارآک ہم اوڑدہی ٹی ساڑی ئسر۔ داوخت آ فریق آک ہڑتوم آ کنڈآتا واپار، توانائی و اقتصادی بشخ آتیٹی کمکاری تون اوار ہڑتوم آ ملک آتا نیام اٹ کمکاری ءِ پین ودفنگ آ گپ وتران کننگا۔ اوڑدہی ٹی ہڑتوم آ فریق آک واپار، رابطہ، توانائی، سیل وسوات و انفارمیشن ٹیکنالوجی کون آ چندی بشخ آتیا چکار کننگ نا اہمیت آ ہم زور شاغسا تعلقداری تے پین سوگو کننگ نا عزم انا درشانی ءِ ہم کرے۔ نگراں بنجائی وزیر ڈٹ بندی ہڑتوم آ ملک آتا نیام اٹ متکن آ سنگتی نا اہمیت و تعلقداری تے پین سوگو کننگ نا عزم انا درشانی ءِ ہم کرے۔ یات سلے کہ 1991 ٹی آذربائیجان نا آزادی نا بحالی آن پد پاکستان تینا آجوئی ءِ امنا کروک آ اولیت ملک آتیٹی اوار ئس۔ نگراں وزیر ڈٹ بندی 2022 نا نوکاپ اٹی آذربائیجان نا کمک نا ستاءِ کرے، یات سلے نوکاپ آن پاکستان بھاز بےوڑ زہمی مسوسس و مشکل نا داساہت اٹ آذربائیجان پاکستان نا پبی کمک ءِ کریسس ہرادے پاکستان قدر انا نظر اٹ ہرک۔ اوڑدہی ٹی آذربائیجان نا سفیر خضر فرہادوف نگراں وزیر ڈٹ بندی ءِ پارے کہ 2022آن آذربائیجان و پاکستان نا نیام اٹ براہ راست جہاز آک داتعلقداری ٹی بھاززیات کمکار جوڑ مننگ ءُ۔ اوپارے کہ 2022اٹی کم و ود 50,000پاکستانی سیل و سواتی آذربائیجان نا دورہ ءِ کریر ہرااسہ ستاکڑزوک ءُ ہیت اسے۔ سفیر نارداٹ آذربائیجان نا حکومت پاکستانی سیل و سواتی تے آن لائن ویزانا کمک اٹ آسراتی فراوان ہم کننگ ءِ۔ سمیع سعید دا گام انا ستاءِ کرے و سیل و سوات نا بشخ اٹی پین کمکاری نا وارخواہی پٹنگ نا است خواہی نا ہم درشانی ءِ کرے۔
