کرغز پارلیمنٹ نا باسک ڈاکٹر زومالیف نا پاکستانی پوریاگرآتے کاروباری وارخواہی تا پٹنگ کن کرغزستان نا دورہ  ءِ کننگ نا سلہ

اسلام آباد۔ 12 ستمبر (اے پی پی) کرغزستان نا ممبر پارلیمنٹ و پاکستان نا دورہ غا بروک آ ڈل انا سروک ڈاکٹر زومالیف پاکستانی پوریاگر آتے شریداری، زرکاری و اسیجائی ڈٹ آتا کسر پٹنگ کن تینا ملک انا دورہ ءِ کننگ نا سلہ خلکنے۔ اوداہیت ءِ سے شنبے نادے آ تینا دورہ نا آخیریکو ریسہ ٹی داڑے کرغزستان ٹریڈ ہاؤس نا چیئرمین مہر کاشف یونس نا کنڈآن پوریاگر برادری تون گپ وتران کرسا پارے۔ ڈل انا ڈپٹی لیڈر گودی روزااما نونو و ایول باسک آک ہم اوڑدہی ٹی ساڑی ئسر۔ اوپارے کہ کرغزستان جان جوڑی، واپار، صنعت و مینو فیکچرنگ نا بشخ اٹی گیشتر وارخواہی فراوان کیک۔ ہڑتوم آملک آتا نیام اٹ واپاری تعلقداری تے پین سوگو کننگ مریک ہراڑان ہڑتوم آتے زرگزرانی وڑاٹ فائدہ مریک انتئے کہ اسیجائی ڈٹ دا ڈیہہ اٹی اہم پیش رفت اس اتنگ کیک۔ اومستی پارے کہ صنعت و مینوفیکچرنگ نا بشخ آتیٹی کرغزستان کسبکار افرادی قوت و کاروباری شونداری کن سازگار حالیت اس پیش کیک۔ تین پہ تینی کمکاری نا کمک اٹ نن شونداری ءِ مون آ دننگ کینہ و ہڑتوم آملک آتیکن فائدہ مند ڈٹ جوڑ کننگ کینہ۔ اوسرکاری کمامدار و ہندی پوریاگر راہشون تے دورہ کننگ نا سلہ خلسا پارے کہ کرغزستان اٹی کاروباری چاگڑد وزرکاری نا گمان تا بارواٹی آگاہی تون اوار اوار پاکستانی ڈل ءِ ننا ملک انا دلکش ندارہ و پبی دودوربیدگ ءِ ہُننگ نا موقع ہم ملک۔