کوئٹہ ۔ 12 ستمبر (اے پی پی)پاکستان مسلم لیگ (ن) نا صوبائی راہشون چوہدری بابر و جاوید احمد خان ئسک پارینو کہ ملک اٹی کنوئی آ گڑاتا تینا خود آن کاختی ودی کروک آک ہچ ءُ رعایت اسے نا حقدار افس، سیکورٹی فورس آتا کنوئی آ گڑاتا کوڑی کننگ، اسمگلنگ اٹی اوار زموار آتا برخلاف کارروائی ستاکڑزک۔ داڑے جاری مروک اسہ اسیجائی بیان اسے ٹی اوفک پاریر کہ ملک اٹی اسہ سجفوک ءُ ڈٹ اسے نا رداٹ بورہ، نُت و ایلو کنوئی آ گڑاتا کاختی ودی کننگ نا کوشست کننگا ہرا اسہ وڑاسے ٹی ہم ملک و قوم انا فائدہ ٹی اف۔ اوپارے کہ گڑاس زموار تینا جند انا فائدہ غاتیکن بورہ و ایلو کنوئی آ گڑاتے غیرکانودی وڑاٹ ہمسایہ ملک اسمگلنگ اٹی اوار ءُ ہرافتا برخلاف کانود نا رداٹ سخت آن سخت کارروائی کننگے و داوڑنا زموار آک ہچ ءُ رعایت اسے نا حقدار افس۔ اوفک پاریر کہ آرمی چیف نا پڑو آن پد سیکورٹی فورس آتا ڈالر و ایلو درملکی کرنسی نا کوڑی کننگ و غیرکانودی کاروبار اٹ اوار زموار آتا برخلاف کارروائی تیان پد پاکستان اٹ ڈالر تون اوار درملکی کرنسی نا ریٹ آتیٹی نمان پرخ بسنے ہراڑان زرگزران سوگو مریک۔ اوفک پاریر کہ پاکستان مسلم لیگ (ن) کوڑی کروک، منشیات بہاکروک و اسمگلر آتا برخلاف سیکورٹی فورس آتا کارروائی تا پبی مخ تفی ءِ کیک۔
