کوئٹہ ۔ 12 ستمبر (اے پی پی)نگراں صوبائی وزیر جان جوڑی ڈاکٹر امیر محمد جوگیزئی پارینے کہ سرکاری ہسپتال آتیٹی الس ءِ مفت طبی آسراتی تا فراوانی نگراں حکومت نا اولیت آتیٹی اوار ءِ، ڈیوٹی تیان غیرحاضر ڈاکٹر و ایلو اسٹاف ہچ ءُ رعایت اسے نا حقدار افس اوفتا برخلاف کانود نا رداٹ کارروائی کننگک۔ داہیت ءِ او تدوک آ دے مسکوہی صوبائی اسمبلی نا باسک نصراللہ خان زیرے، سردار نجیب سنجرانی تون اوڑدہی ٹی گپ وتران کرسا پارے۔ اوپارے کہ بلوچستان نا الس ءِ جان جوڑی کارڈ انا آسراتی نا فراوانی کن غٹ دوئی وسیلہ غاتے کاریم اٹ اتنگ انگ ءِ تانکہ نیزگار الس ءِ درمان نا مفت آسراتی دُوبننگ کے۔ اوپارے کہ بلوچستان نا دارالخلافہ کوئٹہ تون اوار صوبہ نا مر مر انگا علاقہ غاتیٹی سرکاری ہسپتال آتیٹی ڈاکٹر، پیرامیڈیکل اسٹاف و ایلو عملہ نا تینا تعیناتی نا جاگہ غا حاضری ءِ پک کیر ڈیوٹی آن غیرحاضر عملی نا برخلاف کانود نا رداٹ سخت محکمانہ کارروائی کننگک۔ اوپارے کہ صوبہ ٹی غیرفعال سرکاری ہسپتال آتے فعال کننگ کن ہموڑے کنٹریکٹ آ ڈاکٹر آتا تعیناتی کننگ انگ ءِ تانکہ ہسپتال آتے فعال کننگ مرے۔ اوپارے کہ او صوبہ نا سرکاری ہسپتال آتا دورہ ءِ کرسا ہموڑے الس نا ویل آتا جاچ ءِ ہلسا اوفتے ایسر کننگ کن گام گیج کیرہ۔
