اسلام آباد۔ 11 ستمبر (اے پی پی) نگراں وزیراعظم انوارالحق کاکڑ تون جہانی بینک انا کنٹری ڈائریکٹر ناجے بن حسین اوڑدہی کرے۔ اوڑدہی ٹی نگراں بنجائی وزیر خزانہ شمشاد اخترہم ساڑی ئس۔ وزیراعظم آفس میڈیا ونگ آن جاری بیان نا رداٹ داوخت آ وزیراعظم پارے کہ جہانی بینک پاکستان نا پسماندہ علاقہ خاص وڑاٹ بلوچستان نا مر مر انگا علاقہ غاتا شونداری کن کڑد ادا کننگ ءِ، حکومت نا اولیت ءِ کہ پسماندہ علاقہ غاتے ملک انا ایلو بشخ آتیانبار شونداری نا کنڈآ دے۔ وزیراعظم پارے کہ جہانی بینک 2022 نا ترند انگا نوکاپ اٹی زہمی مخلوق نا کمک و بحالی ٹی تینا کڑد ءِ ادا کرے، زہمی علاقہ غاتیٹی برجابحالی نا کاریم ءِ زوت پورو کننگ کن حکومت ہرممکن انتظامی کمک فراوان کیک۔ ناجے بن حسین وزیراعظم ءِ جہانی بینک انا بلوچستان نا پسماندہ علاقہ غاتا شونداری، سندھ اٹی نوکاپ زہمی تا بحالی نا کاریم و جنیوا ٹی جہانی بینک انا کنڈآن نوکاپ زہمی تیکن پڑو کروک کمکی زر انا فراوانی نا بابت پیش رفت آن سرجمی وڑاٹ معلومدار کرے۔
