اسلام آباد۔ 11 ستمبر (اے پی پی) نگراں بنجائی وزیر جان جوڑی ڈاکٹر ندیم جان پارینے کہ لاہور نا چاگڑدی وڑاٹی پولیو دین پک مسنے اوکان پد ملک اٹی مثبت چاگڑدی وڑتا کچ 22 مسنے۔ دوشنبے نادے آ اسہ بیان اسے ٹی او پارے کہ قومی ادارہ جان جوڑی ٹی جوڑ پولیو لیبارٹری نا رداٹ لاہور اٹی ملتان روڈ آن ہلوک آ سیوریج نا وڑتیٹی پولیو دین خننگانے اوکان پد ملک اٹی مثبت چاگڑدی وڑتاکچ 22 مسنے۔ ڈاکٹر ندیم جان پارے کہ لاہور آن برجاسال داتم اسکان چار چاگڑدی وڑرپورٹ مسنے ہرافتیان مسہ وڑجینیاتی وڑاٹ اوغانستان اٹی دین اتون گنڈوک ءُ، شار اٹی آخیریکو پولیو کیس جولائی 2020 اٹی رپورٹ مسوسس۔ اوپارے کہ ملک اٹی اسہ جاگہ اس ہم دین انا ساڑی گری مدام گڑتی نا ہیت اسے، ولے پاکستان پولیو پروگرام ساڑی آ تُو اٹی پولیو سرویلنس نا نظام ءِ پین ودفینے، برجاسال پولیو لیب 1،700 آن زیات چاگڑدی وڑ ٹیسٹ کرینے ہرافتیان 22 مثبت بسر ہرا کم و ود اسہ درسد ءُ۔ وزیر جان جوڑی پارے کہ ملک اٹی داتم اسکان اِرا پولیو کیس رپورٹ مسنے، ہڑتوم آ زہمی چناتا تعلق خیبرپختونخوا نا ضلع بنوں آن ءِ۔
