اسلام آباد۔ 11 ستمبر (اے پی پی) پاکستان اوغان وزارت خارجہ نا کنڈآن طورخم اٹی پاک۔ اوغان سیم انا بندش نا بابت اوغان وزارت خارجہ نا بیان ءِ حیران کن گوندسا پارینے کہ عبوری اوغان کمامدارآک طورخم آ پاکستان اوغانستان سیم انا عارضی بندش نا سوب آتے جوانی اٹ چارہ۔ ترجمان دفترخارجہ ممتاز زہرا بلوچ دوشنبے نادے آ اسہ بیان اسے ٹی پارے کہ پاکستان تینا گل زمین نا تہہ ٹی عبوری اوغان حکومت نا کنڈآن ہروڑنا پنجر نا تفنگ ءِ قبول کننگ کپک انتئے کہ دا اونا وتواجہی نا خلاف ورزی ءِ۔ ترجمان پارے کہ 6 ستمبر آ ہراتم اوغان فوجی تے داوڑنا غیرکانودی پنجر ءِ سلفنگ آن توننگا تو او پرامن ایسری نا جاگہ غا بلااشتعال سم کاری نا سیبو ءِ ہلکر۔ پاکستانی فوجی چوکی تے شست کریر، طورخم بارڈر ٹرمینل نا بنداوی پنجر ءِ نسخان تسر و پاکستانی و اوغان شاری تا جون تے خطرہ ٹی شاغار۔ ترجمان پارے کہ پاکستانی سیمی چوکی تیا داوڑنا بلااشتعال و اندھا دھند سم کاری ءِ اسہ حال اسے ٹی ہم روا گوندنگ مفک اوغان باردڑ سیکورٹی فورس آتا بلااشتعال سم کاری آن دہشت گرد زموار آتا است بڈی مریک، دا زموار آتا اوغانستان نا تہہ ٹی پناہ گاک ءُ ہرافتے اقوام متحدہ نا سلامتی کونسل نا تجزیاتی کمکار و پابندی تا چاروکی ءِ کروک آ ٹیم تینا تازہ رپورٹ اٹ پک کرینے۔ اوپارے کہ نن مدام پارینن کہ ننا است خواہی ءِ کہ اوغانستان تون سیم ہڑتوم آملک آتا نیام اٹ امن و سنگتی نا سیم مرے، نن کیہی دہائی آن پدریسہ بے سوب اشتعال انگیزی تیان پد ہم تحمل نا درشانی ءِ کرینن و گپ وتران ءِ اولیت تسونن۔ ترجمان پارے کہ عارضی بندش بیرہ انتہائی حالیت آتیٹی مریک دُن کہ سیم آ 6 ستمبر 2023 نا واقعہ یا ہراتم اوغان گل زمین پاکستان نا تہہ ٹی دہشت گردانہ جلہو آتیکن استعمال مریک۔ اوپارے کہ اوغان وزارت خارجہ نا بیان اٹی پاکستان نا زرگزران و درملکی واپار نا بارواٹی گڑاس غیر تعلقدار تران و نامناسب مشورہ ہم اوار ارے۔
