اسلام آباد۔ 11ستمبر (اے پی پی) صدر مملکت ڈاکٹر عارف علوی بانی پاکستان قائد اعظم محمد علی جناح ءِ اونا یوم کزیت آ شاندار لوز آتیٹی خراج عقیدت پیش کرسا پارینے کہ پاکستان ءِ اسہ عظیم ءُ ملک اس جوڑ کننگ کن غٹ تر چکار ءِ تعلیم نا فراوانی و نیزگاری نا چٹفنگ آ تخوئی مریک۔ صدر مملکت دوشنبے نادے آ بابائے قوم قائد اعظم نا برسی نا وخت آ تینا کلہو اٹی پارے کہ اینو نادے پاکستان ءِ قائد اعظم نا وژن نا رداٹ اسہ پوسکن ءُ اسلامی آسودہی ریاست اس جوڑ کننگ نا عزم انا درشانی ءِ کینہ۔ اوپارے کہ قائد اعظم امن، بریبری، کانود نا بالادستی ، زرگزرانی و راجی انصاف و اقلیت آتا حق انا وکالت ءِ کرے، اینو نا دے مچ آ پاکستانی قوم برصغیر پاک و ہند نا عظیم راہشون قائد اعظم محمد علی جناح ءِ خراج عقیدت پیش کیک۔ صدر مملکت پارے کہ مسلمانان برصغیر قائد اعظم نا دوراندیش و مدبرانہ کماشی ٹی چنکو وخت اسے ٹی پاکستان ءِ دوئی کرے، قائد اعظم پبی وڑاٹ مسلمانان ہند انا مقدمہ تون مون تس و اسہ جتا ءُ ریاست اس جوڑ کرے۔ ڈاکٹر عارف علوی پارے کہ پاکستان نا شونداری و شونہالی کن قائد اعظم نا پاروک آ روشنا اصول آتیا عمل کروئی مریک۔ اوپارے کہ قائد اعظم نا وژن نا رداٹ ملک انا نزور تپہ غاتون اوار زالبول و ورناتا راجی آسودہی کن کاریم کننگ نا گرج ءِ۔ صدر مملکت برسی نا وخت آ قائد اعظم محمد علی جناح نا درجہ غاتا بڑزی کن ہم دعا کرے۔
