اسلام آباد۔ 11 ستمبر (اے پی پی) کنٹرول لائن نا ہڑتوم آ کنڈآن تعلق تخوک آ 10 باسکی کشمیری ڈل اقوام متحدہ نا انسانی حق کونسل نا 54 می دیوان اٹی بشخ ہلنگ کن جنیوا آ روانہ مسنے۔ کشمیر میڈیا سروس نا رداٹ ڈل انا کماشی ءِ کل جماعتی حریت کانفرنس آزاد جموں و کشمیر شاخ انا راہشون الطاف حسین وانی کننگ ءِ۔ ڈل اٹی سردار امجد یوسف خان، سید فیض نقشبندی ، ایڈووکیٹ پرویزشاہ، شمیم شال، حسن البنائی، پروفیسر شگفتہ اشرف، ڈاکٹر ولید رسول، ڈاکٹر سائرہ شاہ و نائلہ الطاف کیانی ئسک اوار ءُ۔ کشمیری ڈل جنیواٹی تینا اسہ ہفتہ مریس اڈکننگ اٹی اقوام متحدہ نا انسانی حق کونسل دیوان اٹی بشخ ہلنگ آن بیدس اقوام متحدہ نا ہائی کمشنر مہاجرین، خصوصی نمائندہ، سفارتکار و غیرسرکاری جہانی تنظیم (این جی اوز) تا نمائندہ غاتون اوڑدہی کیک و اوفتے بھارت نا غیرکانودی کوزہ ٹی جموں وکشمیر نا ابتر حالیت و مودی نا ہندو توا حکومت نا کنڈآن علاقہ ٹی برجا انسانی حق انا بھلا لتاڑتیان معلومدار کیک۔ ڈل جہانی برادری ءِ مقبوضہ علاقہ ٹی آبادی ناکچ ءِ بدل کننگ نا ناپاک بھارتی کوشست آتابارواٹی ہم معلومدار کیک۔ اقوام متحدہ نا انسانی حق کونسل نا 54 می دیوان اینو آن بناکننگ ءِ و دا 13 اکتوبر اسکان برجاسلک۔
