راولپنڈی۔ 11 ستمبر (اے پی پی) اینٹی نارکوٹکس فورس (اے این ایف ) منشیات اسمگلنگ نا برخلاف برجا کریک ڈاؤن اٹی 11 کارروائی تیٹی 70 کلوگرام آن زیات منشیات دوئی کرسا 11 دوبہ دار ءِ دزگیرکرے۔ اے این ایف ترجمان نا بیان نا رداٹ اے این ایف فورس موٹروے ٹول پلازہ اسلام آباد نا خڑک کارروائی ٹی مسافر بس اسے ٹی سوار 3 دوبہ دار ءِ دزگیرکرے۔ چنیوٹ نا ہنکینی دوبہ دار آتا پڈآن جم وڑاٹ19 ہیرون آن پُر کیپسول دوئی کننگا۔ جہلم اٹی واقع ڈائیو و کارگو آفس اسے ٹی پارسل اسے آن 600 گرام آئس دوئی کننگا ہرا 2 کولرآتیٹی اودیم کرسا پشاور آن اسمگل کننگاسس۔ بھکر اٹی واقع حق باہو ہوٹل نا خڑک ہندی ہنکینی اسے آن 2 کلو 200 گرام چرس دوئی کننگا۔ سیالکوٹ ایئرپورٹ آ مسافر نا ٹرالی بیگ آن 2 کلو 594 گرام آئس دوئی کننگا ہرافتے جہلم نا ہنکینی دوبہ دار جہاز نمبر GF-769نا کمک اٹ بحرین کن روانہ مسکہ۔ ترجمان پارے کہ قصور اٹی پنجاب رینجر تون اسیجائی کارروائی ٹی 5 دوبہ دار دزگیر کرسا اوفتا کوزہ غان 7 کلو 100 گرام ہیرون دوئی مس وخت اس کہ دوبہ دار آتا موٹرسائیکل ءِ ہم کوزہ ٹی ہلنگا۔ پشاور اٹی واقع کوریئر آفس اٹی مری آ مون تروک آ پارسل آن 18 ایکسٹیسی گولی دوئی کننگا۔ راجہ بازار گلگت نا خڑک مستونگ نا ہنکینی دوبہ دارآن 200 گرام چرس و 400 گرام ہفیم دوئی کننگا ۔ باجوڑ نا علاقہ ٹی اسمگلنگ کن اودیم 10 کلوگرام چرس دوئی مس۔ خیبرنا علاقہ سپینہ مورگہ بارڈر نا خڑک اودیم کروک 10 کلو گرام چرس دوئی کننگا۔ گوادر نا علاقہ مزانی نا خڑک اودیم کروک 24 کلوگرام چرس دوئی مس۔ چاغی نا علاقہ گردی جنگل نا خڑک اودیم کروک 15 کلوگرام ہفیم دوئی کننگا۔ ترجمان پارے کہ دزگیر دوبہ دار آتا برخلاف انسدادِ منشیات ایکٹ نا رداٹ مقدمہ درج کرسا مستی جاست وپاست نا بناءِ کننگانے۔
