اسلام آباد۔8ستمبر (اے پی پی):شعبہ پاکستانی زبانیں علامہ اقبال اوپن یونیورسٹی ءَ ایم فل براہوئی ءِ دو اسکالرآں ڈاکٹر ضیاء الرحمان بلوچءِ سروکی ءَ وتی پتء ُ پولی کار سرجم کتگءُ زبانی چکاس داتگ۔ گوستگیں روچءَ ڈین فیکلٹی اف سوشل سائنسز ءِ سیمینار روم ءَ پروفیسر ڈاکٹر عبدالعزیز ساحر( ڈین ) ءِ سروکی ءَ ایم فل براہوئی ءِ دو اسکالر آں زبانی چکاسءِ مراگش برجم دارگ بوتگ ، کہ آئیءِ صدر شعبہ پاکستانی زبانیں پروفیسر ڈاکٹر عبداللہ جان عابد، ڈیپارٹمنٹ ءِ ایندگہ راہ دربر ڈاکٹر حاکم علی برڑو، ڈاکٹر ضیا ء الرحمن بلوچءُ ڈاکٹر زیب النساء ہوار بوتگ اَنت، ڈن ءَ چہ آیوکیں راہ دربر ڈاکٹر واحد بخش بزدار (قائد اعظم یونیورسٹی اسلام اباد ) بوتگ، کہ آیاں اسکالرآں چہ سرحال ءِ ہوالگءَ جُستءُ پُرس کتگ۔ نودربرآں جستانی گوں سدکی ءَ پسو داتگ کہ ایشی ء ِ ردءَ پینل ءَ آیاناں ایم فل ءِ ڈگری دئیگءِ سفارش کتگ۔ نودبرآنی نام ء ُ سرحال
1۔حفیظ اللہ
سرحال ۔براہوئی رسالہ ایلم توضیحی اشاریہ سازی ۔
2 عبدالسلام
سرحال :براہوئی رسالہ توئی مہر و استار توضیحی اشاریہ سازی
ڈاکٹر ضیاء الرحمان بلوچ ءِ سروکی ءَ بوتگیں دوئیں پٹء ُ پولی کار باز ارزشت مند اَنت، چیا کہ براہوئی ءَ اشاریہ سازی ءِ سرءَ اینچو گیش کار کنگ نابوتگ ء ُ اے پٹء ُ پولی کار اے ہوالگءَ حاسیں بُن اِشت اِت کہ پولکار ء ُ وانوکاناں ارزانی دنت ءُ ایشی ءَ چہ اے صنف ءِ تہا پٹءُ پول ءِ نوکیں کِشک پچ بنت۔ براہوئی تاک ایلم 1960 ءَ نامداریں صحافی شاعر ء ُ ازم کار نورمحمد پروانہ ءَ بندات کتگ بوتگ۔ اے براہوئی ءِ اولی تاک بوتگ، کہ آئیءِ تہا براہوئی ءِ نامداریں ازمکار، ادیب ، شاعرء ُ زانت کار ء ُ نبشتہ کار ہوار اَنت۔ آئیءِ سرپرستی قبائلی نواب دودا خان زرکزئی ء ُ نواب غوث بخش رئیسانی ءَ کتگ۔ دومی مقالہ براہیوئی ءِ دو حاسیں تاک توئی مہرء ُ استار ءِ اشاریہ سازی اِت۔ استار 2001 ءَ وہد ے کہ مہر 2005 ءَ چہ یکوئیءَ شنگ بوہگءَ اَنت کہ آیانی تہابراہوئی زبان ء ُ لبزانک ءِ بازیں تر، تحریکات رحجانات ءِ ہوالگءَ حاسیں سرھال ء ُ نبشتہ ہوار اَنت۔ نودبرآں دوئیں رسالہ آنی گوستگیں 20 سالانی علمی ءُ لبزانکی میراث مُچ کتگء ُ اشاریہ سازی کتگ کہ آئی ءَ چہ پولکار ءُ نودربر پائدگ چست کناں۔ یات بہ کن اِت کہ شعبہ پاکستانی زبانیں ایشی ءَ چہ پیسر ہم براہوئی زبان ء ُ لبزانک ءِ دیما برگءُ دیمروئی کنگءَ تاک ء ُ ماہتاکانی کردءِ سرءَ ہم پٹء ُپولی کارکنائینتگ۔ شعبہ پاکستانی زبانیں وتی اسکالر آناں ایم فل ءِ ڈگری سرجم کنگءَ مراد بات پیش کنتء ُ باندات ءَ آیانی شاتءُ شاتکامی ء ُ سوبین بوہگءِ دعاءَ کنت۔
