لاہور۔ 08 ستمبر (اے پی پی) دریائے ستلج تون اوار پنجاب نا غٹ دریاک ہڑدے آنبار وہینگ ءُ۔ جمعہ نادے آ جاری بیان اٹی ترجمان پراونشل ڈیزاسٹر مینجمنٹ اتھارٹی پنجاب (پی ڈی ایم اے ) پارے کہ پنجاب نا غٹ دریاک ہڑدے آنبار وہینگ ءُ، دریائے سندھ اٹی تربیلا و چشمہ نا ہند آتیا دیر انا کچ اٹی ودکی ریکارڈ کننگانے، تربیلا نا ہنڈ آ دیر انا بننگ 1 لکھ 14 ہزار و پیش تمنگ 86 ہزار کیوسک ءِ، وخت اس کہ چشمہ نا ہند آ دیر انا بننگ 1 لکھ 67 ہزار و پیش تمنگ 1 لکھ 49 ہزار کیوسک ءِ، دریائے جہلم ، راوی، چناب و ستلج اٹی دیر انا ترندی نارمل ءِ۔ ترجمان پی ڈی ایم اے نا مستی پاننگ ئس کہ دریائے ستلج نا نوکاپ آن زہمی علاقہ غاتیٹی بحالی نا گام گیج برجاءِ، زہمی علاقہ غاتیٹی شاری تے اِرغ، کُننگ کن ساف دیر، دوائی و ایلو آسراتی تے فراوان کننگ انگ ءِ، نوکاپ آن زہمی علاقہ غاتیٹی دینی مرض آتا توننگ کن ہم گام گیج کننگ انگ ءِ، میڈیکل کیمپ آک 24 گھنٹہ شاری تے طبی آسراتی فراوان کننگ ءُ۔ اونا پاننگ ءِ کہ ڈی جی پی ڈی ایم اے پنجاب عمران قریشی نا پارت آ زہمی علاقہ غاتا پورو بحالی اسکان ریلیف نا گام گیج برجاسلک۔
