اسلام آباد۔ 08 ستمبر (اے پی پی) شعبہ پاکستانی زبان علامہ اقبال اوپن یونیورسٹی ٹی ایم فل براہوئی نا اِرا اسکالرز ڈاکٹر ضیاء الرحمان بلوچ نا چاروکی ٹی تینا پٹ وپولی کاریم ءِ پورو کرسا زبانی امتحان تسر۔ تدوک آ دے ڈین فیکلٹی آف سوشل سائنسز نا سیمینار روم اٹی پروفیسر ڈاکٹر عبدالعزیز ساحر(ڈین) نا کماشی ٹی ایم فل براہوئی نا اِرا اسکالر آتا زبانی امتحان نا دود اس اڈ ہلک، ہراٹی صدر شعبہ پاکستانی زبان پروفیسر ڈاکٹر عبداللہ جان عابد، شعبہ نا استاد آک ڈاکٹر حاکم علی برڑو، ڈاکٹر ضیاء الرحمان بلوچ، وڈاکٹر زیب النساء ئسک بشخ ہلکر ، پیشن نا ممتحن ڈاکٹر واحد بخش بزدار(قائد اعظم یونیورسٹی اسلام آباد) ئس، ہرا طالب علم آتیان سرحال نا بابت سوج اَرفے۔ طالب علم آک اَرفوک آتا مدلل ورندی تسر، ہراڑا پینل اوفتے ایم فل نا ڈگری تننگ نا سفارش کرے۔ طالب علم آتا پن و سرحال آک
1۔ حفیظ اللہ سرحال۔ براہوئی رسالہ ایلم توضیحی اشاریہ سازی۔ 2 ۔ عبدالسلام سرحال: براہوئی رسالہ توئی مہرو استار توضیحی اشاریہ سازی ۔ ڈاکٹر ضیاء الرحمان بلوچ نا چاروکی ٹی مروک آ ہڑتوم آ پٹ وپولی کاریم بھاز اہمیت تخرہ، انتئے کہ براہوئی ٹی اشاریہ سازی نا روایت داخہ در توانا اف و داپٹ وپولی کاریم دا بابت اہم ءُ پیش رفت اسے، ہرا پولکار و قارئین تے بیرہ آسانی فراوان کیک بلکن داڑان دا صنف اٹی پٹ وپول نا پوسکن ءُ کسر مون آ بریک۔ براہوئی رسالہ ایلم 1960 ء ٹی پنی آ صحافی شاعر و ادیب نور محمدپروانہ دانا بناءِ کریسس۔ دا براہوئی نا اولیکو و جامع رسالہ ئس ہراٹی براہوئی نا پنی آ ادیب، شاعر، دانشور و لکھاری تا نوشتہ غاک اوار ءُ۔ دانا سرپرستی ءِ قبائلی نواب دوداخان زرکزئی و نواب غوث بخش رئیسانی ئسک کرینو۔ دا رسالہ اسہ قول اسے نا ترجمان ءِ، اسہ تاریخ اسے و کیہی حوالہ غاتیان بنداوی ماخذ ءِ ہرانا 40 سال انا ریکارڈ ءِ یکجا کرسا اونااشاریہ سازی ءِ کننگانے۔ ارٹ میکو مقالہ براہوئی نا اِرا اہم رسالہ توئی مہر و استار نااشاریہ سازی ءِ۔ استار 2001 آن وخت اس کہ مہر 2005 آن پدریسہ شینک مننگ ءُ ہرافتے ٹی براہوئی زبان و ادب نا چندی اصناف، تحریکات رجحان آتا بابت اہم سرحال و نوشتہ اوار ءُ۔ طالب علم دا ہڑتوم آ رسالہ غاتا تدوک آ 20 سال آتا علمی وادبی سرمایہ ءِ یکجا کرسا اشاریہ سازی کرینو ہراڑان پولکار و طالب علم آک فائدہ ہرفنگ کیرہ۔ یات سلے کہ شعبہ پاکستانی زبان داکان مست ہم براہوئی زبان و ادب نا مون آ دننگ اٹ رسائل و جرائد نا کڑد آ ہم پٹ وپولی کاریم کرفینے۔ شعبہ پاکستانی زبان تینا اسکالرآتے ایم فل نا ڈگرینا سرسہب پوروی آ مبارکباد پیش کرسا آخبت اٹ اوفتا سرسہبی کن دعا کرینے۔
