کوئٹہ۔ 08 ستمبر (اے پی پی)ڈپٹی کمشنر ہرنائی محمد جاوید ڈومکی ناکماشی ٹی ضلع نا غٹ محکمہ غاتا سروک آتا درستی راستی دیوان اس اڈتننگا۔ دیوان اٹی ایڈیشنل ڈپٹی کمشنر ارباب سعید علی کاسی تون اوار محکمہ تعلیم ، جان جوڑی، آبپاشی ، بی اینڈ آر ، کشت وکشار، فارسٹ ، لوکل گورنمنٹ، سوشل ویلفیئر و ایلو محکمہ غاتا انتظامی آفیسر آک بشخ ہلکر۔ داوخت آ لائن ڈیپارٹمنٹ نا سروک آک ڈپٹی کمشنر ءِ تینا تعلقدار محکمہ غاتا بابت حوال تسر۔ آفیسر آک محکمہ غاتا کارکڑد رپورٹ پیش کننگا۔ و محکمہ غاتیٹی ملازم آتا کچ و خورک آسانی تا بابت پاریر۔ و ضلع ٹی برجااسکیم تا بابت سرجم آتے پیش کریر۔ دیوان آن تران کرسا ڈپٹی کمشنر پارے کہ ضلعی کہول آ کاریم کروک آ غت محکمہ غاتا انتظامی آفیسر آک تینا محکمہ غاتا کارکڑد ءِ پین گچین کیر۔ و تینا ماتحت ملازم آتے سٹیشن آ حاضری نا پابند کرسا کارکڑد نا گچینی آ خاص چکار تخر۔ اوپارے کہ شار اٹی امن و ایمنی تون اوار جان جوڑی و تعلیم نا ویل آتیکن جوان گام گیج کننگ نا گرجءِ۔ کنوئی آ گڑاتا نہاد آتے کنٹرول کننگ، زیات میعاد گڑاتے تلف کننگ وسفائی ستھرائی نا نظام ءِ سہی سمت آ دننگ کن تعلقدار محکمہ غاک تینا کڑد ءِ ادا کیر۔ اوپارے کہ لائن ڈیپارٹمنٹ نا آفیسر واسٹاف آ شاری تا مشکل آتا ایسری نا بابت بھلو زمواری اس بیٹ مریک۔ اوفتا راجی آسودہی و شونہالی کن ننے غٹ ءِ اواری اٹ تینا بشخ انا کاریم بلاتاخیر کروئی ءِ۔ ڈپٹی کمشنر محمد جاوید ڈومکی پارے کہ شار اٹی نظم و نسق ءِ برقرار تخنگ کن کانود نا خلاف ورزی کننگ نا موکل کس اسے تفننگک۔ خلاف ورزی کرک آتا برخلاف کانود حرکت اٹی بریک۔
