اسلام آباد۔ 07 ستمبر (اے پی پی) نگراں بنجائی وزیر قومی جان جوڑی ڈاکٹر ندیم جان پارینے کہ سعودی عرب تون پاکستان نا جذباتی تعلقداری و والہانہ مہرومریبت نا اعتراف ءِ کینہ و اودے قدر انا نظر اٹ ہرنہ، پاکستان دنیا نا اولیکو ملک ءِ ہرا گلوبل ہیلتھ سیکورٹی سمٹ ءِ اڈترفنگ ءِ ، فارما انڈسٹری نا ایکسپورٹ ءِ ودفنگ کن مربوط حکمت عملی اس جوڑ کرینن۔ داخیال آتا درشانی ءِ او پاکستان اٹ سعودی عرب نا سفیر نواف بن سعید المالکی تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی جان جوڑی نا بشخ اتون اوار ہڑتوم آ کنڈآتا کمکاری و تین پہ تینی امور آ گپ وتران کننگا۔ اوڑدہی ٹی سعودی سفیر وزارت جان جوڑی نا قلمدان ءِ سنبھالنگ آ مبارکبادی تس و پارے کہ گلوبل ہیلتھ ایکسپرٹ نا تعیناتی جوان ءُ شگون اسے، نا سرسہبی کن دعاکیوہ۔ اوپارے کہ پاکستان نا میڈیکل بشخ آن سعودی عرب ہم فائدہ دوئی کیک۔ داوخت آ ڈاکٹر ندیم جان پارے کہ سعودی عرب نا پاکستان تون جذباتی وابستگی و والہانہ مہرومریبت نا اعتراف ءِ کینہ و اودے قدر انا نظر اٹ ہرنہ۔
