اسلام آباد۔ 07 ستمبر (اے پی پی) نگراں وزیراعظم انوارالحق کاکڑ پارینے کہ ہراتم اسکان پاکستان اٹ خراج ہلنگ اٹ ودکی مفک ہموتم اسکان ملکی زرگزران گچین مننگ کپک، اسمگلنگ نا توننگ کن مچ آ ملک خاص وڑاٹ سیمی علاقہ غاتیٹی آپریشن نا بناءِ کننگانے، کاروباری برادری نا ویل آتا ایسر حکومت نا اولیت آتیٹی اوار ءِ، کاروباری برادری ساڑی آ ملکی زرگزرانی حالیت آتیان پد ہم ملکی زرگزران نا شونداری ٹی تینا اہم کڑد ءِ ادا کننگ تون اوار اوار روزگار نا وارخواہی فراوان کننگ ءِ۔ وزیراعظم آفس نا میڈیا ونگ آن جاری بیان نا رداٹ نگراں وزیراعظم انوارالحق کاکڑ تون اسلام آباد ایوان واپار و صنعت نا ڈل صدر احسن ظفر بختاوری نا کماشی ٹی اوڑدہی کرے۔ اوڑدہی ٹی سیکرٹری کامرس، سیکرٹری صنعت، چیئرمین ایف بی آر، چیئرمین سی ڈی اے و تعلقدار بڑزکو کمامدارآک بشخ ہلکر۔ داوخت آ گپ وتران کرسا نگراں وزیراعظم پارے کہ کاروباری تپہ نا سلاہ تا خیرمقدم ءِ کیوہ، اوفتیان عمل نا قابل سلاہ تیا عملدرآمد نا باوری کرفیوہ، وزارت عظمیٰ نا زمواری تے سنبھالنگ تون کاروباری برادری تون اوڑدہی کریٹ و اوفتا ویل آتے بِنگٹ، کاروباری برادری ساڑی آ ملکی زرگزرانی حالیت آتیان پد ہم ملکی زرگزران نا شونداری ٹی تینا اہم کڑد ءِ ادا کننگ تون اوار اوار روزگار نا وارخواہی فراوان کننگ ءُ۔ نگراں وزیراعظم پارے کہ حکومت خراج نا نظام اٹ اصلاحات ءِ پک کننگ ءِ ہراڑکن خراج نا نظام ءِ ڈیجیٹلائز کننگ انگ ءِ ، ہراتم اسکان پاکستان اٹ خراج ہلنگ اٹ ودکی مفک ہموتم اسکان ملکی زرگزران نا گچین مننگ کپک، اسمگلنگ نا توننگ کن مچ آ ملک خاص وڑاٹ سیمی علاقہ غاتیٹی آپریشن نا بناءِ کننگانے، اسمگلنگ نا توننگ نا بابت تدوک آ 48 گھنٹہ ٹی کریک ڈائوں کننگانے ہرانا مثبت بھرم دوئی مننگ ءِ۔ اوپارےکہ ہمسایہ ملک آتون واپار نا مون آ دننگ نا بابت سلابت برجاءِ۔ اسمگلنگ نا توننگ نا ہمسایہ ملک آتا کمامدار آتا خیرمقدم ءِ کرینن۔ پوریاگر، صنعت کار و زرکارآتا پت ءِ بحال کرسا ملکی زرگزران ءِ پین سوگو کینہ، بجلی نا بشخ اٹی اصلاحات نا عمل ترندی اٹ برجاءِ، بجلی دُز آتا برخلاف گچین کارروائی کننگک، ملکی ویل آتا ایسری کن غٹ اسٹیک ہولڈر آتون سلابت المی ءِ، وزارت کامرس مچ آ ملک انا چیمبرا ٓتیان باقاعدگی اٹ سلاہ و سلابت ءِ پک کے۔ وزیراعظم پارت کرے کہ ایف بی آر پوائنٹ آف سیلز نا دنگ ءِ ودفنگ نا بابت زوت رپورٹ اس پیش کننگے۔ پاکستانی سفارت خانہ غاتیٹی تعینات کمرشل اتاشی تا کارکڑد ءِ گچین کننگے، سی ڈی اے نا نظام اٹ گچینی اتنگے و کاروباری برادری ءِ سلابتی عمل نا بشخ جوڑ کننگے، سی ڈی اے شاری تے تروک آ غٹ آسراتی و لینڈریکارڈ ءِ ڈیجیٹلائز کے، اوڑدہی ٹی پوریاگر برادری نگراں وزیراعظم ءِ وزارت عظمیٰ نا منصب ءِ سنبھالنگ آ مبارکباد پیش کرے۔ ڈل وزیراعظم ءِ پوریاگر برادری نا ویل آتا بابت معلومدار کرے و اوفتا ایسری کن تینا سلاہ تے پیش کرے۔ وزیراعظم ڈل انا سلاہ تا خیرمقدم ءِ کرے ا وفتا ویل آتے ایسری نا باوری کرفے۔
