کوئٹہ ۔ 07 ستمبر (اے پی پی) نگراں وزیرکانود بلوچستان و پارلیمانی امور و پراسکیوشن امان اللہ کنرانی پارینے کہ نگراں صوبائی کابینہ گاڈی و آسودہی تیان ایڑتر و قومی جوزہ غان سرشار مرسا آئینی زمواری تے قومی فرض تکسا ادا کننگ ءِ و کانود و قاعدہ نا رداٹ الیکشن کمیشن اسہ نوٹیفکیشن اس جاری کرسا غٹ مسکوہی گچین مروک آ نمائندہ غاتے پابند کرینے کہ او تینا تینا اسمبلی ناآئینی مد چٹنگ آن پد تینا گاڈی و اُراتے پدی ایتر۔ اومیڈیا تون گپ و تران کرسا پارے کہ مسکوہی گچین مروک نمائندہ غاک آئین نامتعلقہ شق آتا رداٹ نادہندگی آن بچنگ کن بجلی وگیس و بینک انا سلوک آ پیسہ غاتا تننگ ءِ پک کیر ایلودروشم اٹ الیکشن کمیشن نا کنڈآن نوٹیفکیشن نا جاری مننگ آن پد سرکاری وسیلہ و ذریعہ غاتے کاریم اٹ اتنگ الیکشن کانود ایکٹ مجریہ 2017 ءِ مون آ تخسا کرپٹ پریکٹس نا زمرہ ٹی بریک ہراڑا تعلقدار دفعہ غاتا رداٹ اوفتا برخلاف مقدمہ درج مننگ آن پد سزا و نابودی نا سوب ہم جوڑ مننگ کیک۔ اوپارے کہ ناخوشگوار حالیت آتیان بچنگ کن تعلقدار خواجہ غاک تینا گاڈی تے پدی و اُراتے خورک کیر، بلوچستان ہائی کورٹ نا ڈویژن بنچ ہم دا بابت نوٹس ہلک ہراٹی غٹ محکمہ غاتیان کاریم اٹ اتوک آ گاڈی تا سرجم آتے بٹنگ انگانے و محکمہ اونا پابندءُ۔ اوپارے کہ سرکاری وسیلہ غاتا سیاسی مسخت آتیکن کاریم اٹ اتنگ کرپٹ پریکٹس نا رداٹ قابل سزا ڈوہ ءِ وخت اس کہ سرکاری آفیسر نا غیر حقدار بندغ ءِ آسراتی فراوان کننگ واکداری تا ناروا کاریم اٹ اتنگ نا رداٹ نیب انا دفعہ 10/9اٹی کارروائی نا موجب جوڑ مننگ کیک ہراٹی دمدستی دزگیری و سزا و ملازمت آن برخاستگی ہم اوار ءِ۔
