اسلام آباد۔ 07 ستمبر (اے پی پی) نگراں بنجائی وزیر قومی جان جوڑی ڈاکٹر ندیم جان پارینے کہ پشاور و کراچی نا چاگڑدی وڑتیٹی پولیو دین پک مسنے ، دین انا ہچ ءُ سیم اس مفک، لمہ و باوہ تینا چناتا پولیو ویکسی نیشن و رکھی ٹیکہ غاتا کورس ءِ ضرور پورو کرفر۔ پنچ شنبے نادے آ وزارت جان جوڑی آن جاری بیان نا رداٹ ڈاکٹر ندیم جان پارے کہ پشاور و کراچی آن اگست اٹی ہلوک آ چار چاگڑدی وڑتیٹی پولیو دین خننگانے۔ قومی ادارہ جان جوڑی ٹی جوڑ پاکستان پولیو لیبارٹری پشاور اٹی شاہین مسلم ٹائون نا ہند آن 17 اگست آ ہلوک آ سیوریج نا دیر تا وڑ، نرے خوڑاٹی اِرا ہند آن 22 اگست آ ہلوک آ اِرا وڑو کراچی کیماڑی ٹی محمد خان کالونی آن 17 اگست آ ہلوک آ چاگڑدی وڑاٹی دین ءِ پک کرینے۔ لیب انا رداٹ غٹ وڑتیٹی خننگوک آ دین جینیاتی وڑاٹ اوغانستان اٹی مروک آ دین اتون گنڈوک ءِ۔ بنجائی وزیر جان جوڑی ڈاکٹر ندیم جان پارے کہ چندی چاگڑدی وڑتیٹی پولیو دین نا خننگ انگ بھاز گڑتی اسے انتئے کہ داڑان پاش مریک چناتے دا ناجوڑی آن پدریسہ خطرہ ءِ۔ اوپارے کہ دین انا ہچ ءُ سیم اس مفک۔ اومخلوق تون اسہ جاگہ غان ایلو جاگہ غاکاہک و چناتے ناجوڑ کیک۔ اوپارے کہ پاکستان و اوغانستان اواری اٹ دا دین انابرخلاف جنگ تننگ ءُ ولمہ و باوہ غاتیا زور شاغا کہ او تینا چناتے کیہی وار پولیو نا پڑی کنفر و اوفتا رکھی ٹیکہ غاتا کورس ءِ ہم پورو کرفر تانکہ او ناجوڑی آن بچنگ کیر۔
