اسلام آباد۔ 06 ستمبر (اے پی پی) نگراں وزیراعظم انوارالحق کاکڑ پارینے کہ خصوصی سرمایہ کاری سہولت کونسل نا پلیٹ فارم آن آئی ٹی نا بشخ اٹی زرکاری نا مون آ دننگ نا غٹ ہدف آتے پورو کننگک ، غٹ جامعہ غاتیٹی آئی ٹی نا بابت جہانی آب انا تعلیم وکسب نا فراوانی ءِ پک کننگک ، حکومت ہندی کہول آ تیارہائی ٹیک گڑاخاص وڑاٹ سمارٹ فون تا مو ن آ دننگ کن اولیتی بنداو تیا گام گیج کیک۔ داخیال آتا درشانی ءِ او چارشنبے نادے آ انفارمیشن ٹیکنالوجی و ٹیلی کام بشخ انا بابت اڈ ہلوک جاچ دیوان نا کماشی ءِ کرسا کرے۔ دیوان اٹی نگراں بنجائی وزیر انفارمیشن ٹیکنالوجی ڈاکٹر عمر سیف، سلاہکار وزیراعظم احد خان چیمہ و تعلقدار بڑزکو کمامدارآک بشخ ہلکر۔ دیوان اٹی وزیراعظم ءِ انفارمیشن ٹیکنالوجی و ٹیلی کام بشخ آ سرجمی اٹ حوال تننگا۔ دیوان ءِ پاکستان نا آئی ٹی بشخ انا شونداری کن وزارت نا گام گیج و ملکی آئی ٹی برآمد آتے ودفنگ کن لائحہ عمل اس پیش کننگا۔ دیوان ءِ پاننگاکہ وزارت آئی ٹی بنجائی کہول آ غٹ سرکاری خذمت آتے ڈیجیٹلائزکرسا اوفتے اسہ چھتری نا شیف آن اتنگ کن گام گیج کننگ ءِ، دا گام آن حکومت ءِ خراج نا وصولی نا نظام ءِ گچین کننگ اٹ کمک رسینگک و خراج دُزی نا گچین پیدواری مننگ کیک۔ داکان بیدس پاکستان نا زرگزران نا پورو ڈیجیٹلائزیشن نا ہدف ءِ ہم دوئی کننگک۔ دیوان ءِ ملکی آئی ٹی صنعت نا شونداری کن وزارت نا گام گیج آتیان ہم معلومدار کننگا۔
