اسلام آباد۔ 06 ستمبر (اے پی پی) صدر مملکت ڈاکٹر عارف علوی پارینے کہ جنگ ءِ ستمبر ننا تاریخ اٹ بدل مفروک قومی عزم، کسبی مہارت و حب الوطنی نا جوزہ و قربانی تا نشانی نا وڑاٹ اسہ یات گار ءُ حیثیت اس تخک، اینو نادے نن امن نا مون آ دننگ و پرامن بقائے باہمی نا تینا پالیسی آ عمل کننگ نا عزم انا درشانی ءِ کینہ، نن تینا قومی و جہانی زمواری تیان معلومدار اُن و اقوام متحدہ نا بیرک نا کیرغ آن دنیاٹی امن کن تینا کڑد ءِ ادا کرساکینہ، جموں وکشمیر نا متکن آ جھیڑہ نا ایسری نا چاری اُن۔ ایوان صدر نا پریس ونگ آن جاری بیان نا رداٹ داخیا ل آتا درشانی ءِ او چارشنبے نادے 6 ستمبر 2023ء آ یوم دفاع و شہداء نا وخت آ تینا خصوصی کلہو اٹی کرے۔ صدر مملکت پارے کہ نن لمہ وطن نا خاطر تینا جون تے ندر کروک آ شہید و اوفتا خاہوت آتے خراج تحسین پیش کننگ کن 6 ستمبر آ یوم دفاع و شہدا اڈایتنہ، 58 سال مست اینو نادے ننا سلہہ بند فوج و مچ آ پاکستانی قوم بھلو جیرت و بے مٹ جوزہ نا درشانی ءِ کرسا دشمن نا ناپاک عزم ءِ بے سہب کریسس، جنگ ءِ ستمبر ننا تاریخ اٹ بدل مفروک قومی عزم، کسبی مہارت و جوزہ حب الوطنی و قربانی تا علامت نا وڑاٹ اسہ یات گار ءُ حیثیت اس تخک۔ اوپارے کہ اینو نادے لمہ وطن نا نرزور مارک دشمن نا برخلاف بے خوفی اٹ جنگ ترسا تاریخ نا روشنا ءُ بشخ اس نوشتہ کریر، اینو نن ہمو شہید آتے سلام پیش کینہ ہرافک دفاعِ وطن نا فرض ءِ پورو کرسا تینا جون تے ندر کریر۔
