اسلام آباد۔ 06 ستمبر (اے پی پی) نگراں بنجائی وزیر حوالکاری و شینکاری مرتضیٰ سولنگی پارینے کہ نگراں حکومت آئین وکانود آن ایڑتر ہچ ءُ ضابطہ اس جاری کپک۔ چارشنبے نادے آ داڑے نگراں بنجائی وزیر توانائی محمد علی و سیکرٹری توانائی راشد محمود لنگڑیال تون اوار پریس کانفرنس آن تران کرسا مرتضیٰ سولنگی پارے کہ نگراں حکومت تینا آئینی مینڈٹ آن ایڑتر ہچ ءُ گام اس ہرفپک۔ اوپارے کہ پاکستان اٹ بجلی نا ودوک آ نہاد آتا زموار تیٹی بجلی دُزی غٹ آن بھلا عنصر ءِ، ہرسال 589 ارب روپئی نا بجلی دُزی مریک۔ توانائی نا بشخ اٹی اصلاحات وخت انا گرج ءِ۔ نگراں بنجائی وزیر حوالکاری پارے کہ اینو نا پریس کانفرنس بجلی دُزی نا بابت ءِ وخت اس کہ بجلی نا بل آتیٹی ودکی نا پدی ایلو عوامل آتا بارواٹی پین میڈیا حوال تننگک۔ اوپارے کہ نگراں حکومت بروک آدے تیٹی بجلی نا صارف آتے ریلیف فراوان کننگ کن کروک آ گام گیج آتا بابت میڈیا ءِ معلومدار کیک۔ اسہ سوج اسے نا ورندی ٹی اوپارے کہ اسہ وزیر اسے ہم مفت بجلی تفننگ انگ ءِ۔ داوخت آ پرنسپل انفارمیشن آفیسر و ایم ڈی اے پی پی محمد عاصم کچھی ہم ساڑی ئسک۔
