اسلام آباد۔ 05 ستمبر (اے پی پی) نگراں وزیرداخلہ سرفراز احمد بگٹی ملک اٹی امن و ایمنی ءِ حکومت نا اولیت گوندسا پارینے کہ بندغ یا گروہ سے نا کنڈآن تشدد پسندانہ سرجزآتے اسُل سگنگ پننگک۔ پاکستان اٹ غیرکانودی وڑاٹ رہینگوک درملکی تا وطن آ پدی ہِننگ کن جوان ءُ حکمت عملی اس جوڑ کننگے۔ داخیال آتا درشانی ءِ او سے شنبے نادے آ وزیراعظم نا کنڈآن تروک آ ہدف آتیا جاچ دیوان نا کماشی ءِ کرسا کرے۔ دیوان اٹی سیکرٹری انسداد منشیات ڈویژن منیر اعظم، اسپیشل سیکرٹری داخلہ ندیم محبوب ، ڈی جی اے این ایف میجر جنرل محمد انیق الرحمان ملک ئسک بشخ ہلکر۔ ڈی جی ایف آئی اے محسن حسن بٹ، نیشن کوآرڈی نیٹر نیکٹا طاہر رائے و ایلو بڑزکو آفیسر آک ہم دیوان اٹی بشخ ہلکر۔ وزیرداخلہ پارے کہ ملک اٹی امن وایمنی حکومت نا اولیت ءِ، بندغ یا گروہ سے نا کنڈآن بیداد پسندانہ سرجزآتے اسُل سگنگ پننگک۔ پاکستان اٹ غیرکانودی وڑاٹ رہینگوک درملکی تے وطن آواپسی کن جوان حکمت عملی اس جوڑ کننگے۔ پاک۔ ایران سیم آ مسہ پین بارڈر کراسنگ ملنگ نا بابت ایکشن پلان زوت آن زوت پورو کننگے۔ وزیرداخلہ پارے کہ پولیس و سیکورٹی ادارہ غاتا کارکڑد ءِ گچین کننگ کن اوفتا دنگ انا پیدوار تعین بے کچ المی ءِ، سول آرمڈ فورس آتا گچینی کن پوسکن آ تربیت و وسیلہ فراوان کینہ۔
