اسلام آباد۔ 05 ستمبر (اے پی پی) نگراں وزیراعظم انوارالحق کاکڑ پارینے کہ ملک اٹی قدرتی وسیلہ غاتا کاریم اٹ اتنگ کن گچین گام گیج و سڑک آتا بنداوی پنجر ءِ گچین کننگ نا گرج ءِ غیرکانودی کانڑ کنی ءِ توننگ کن سخت گام گیج کننگے۔ داخیال آتا درشانی ءِ او سے شنبے نادے آ تینا کماشی ٹی پیٹرولیم ڈویژن نا بابت بڑزکو کہولی دیوان اٹی گپ وتران کرسا کرے۔ دیوان اٹی نگراں بنجائی وزیر پاور و پیٹرولیم محمد علی، سلاہکار نگراں وزیراعظم احمد چیمہ و تعلقدار سرکاری آفیسر آک بشخ ہلکر۔ دیوان اٹی نگراں وزیراعظم ءِ پیٹرولیم ڈویژن نا کارکڑد نا بابت سرجم حوال تننگا۔ نگراں وزیراعظم پارے کہ پاکستان نا بے پنہا قدرتی وسیلہ غاتا لائخی ءِ پبی وڑاٹ کاریم اٹ اتنگ کن پین گام گیج کننگ نا گرج ءِ۔ قدرتی وسیلہ اسکان رسینگ کن روڈ انفراسٹرکچر ءِ گچین کننگ نا گرج ءِ۔ غیرکانودی کانڑ کنی ءِ توننگ کن سخت گام گیج کننگے۔ آئل اینڈ گیس ڈویلپمنٹ اتھارٹی نا سروک نا زوت تقرری کن غٹ کانودی خواست آتے پورو کننگے۔ حوال اٹی دیوان ءِ پاننگاکہ پیٹرولیم ڈویژن پروڈکشن انہانسمنٹ پروگرام آ کاریم کننگ ءِ۔ پیٹرولیم ڈویژن ملک اٹی پین قدرتی وسیلہ غاتا پٹنگ کن کوشست کننگ ءِ، پیٹرولیم ڈویژن منرل سیکٹر ڈویلپمنٹ فریم ورک اس مرتب کننگ ءِ و مائننگ سیکٹر اٹی درملکی زرکاری نا مون آدننگ کن مثبت سمت آ مون آ ہِننگ ءِ۔
