واشنگٹن۔ 05 ستمبر (اے پی پی) امریکہ ٹی پاکستان نا سفیر مسعود خان امریکی کانگریس نا زالبول باسک میلانی سٹینز بری تون نیو میکسیکو نا شار البوکیور کیو ٹی اوڑدہی کرے و آبی وسیلہ غاتا بست وبند نا بابت گپ و تران کریر۔ پاکستانی سفارت خانہ نا کنڈآن جاری پریس ریلیز نا رداٹ سفیر اوڑدہی ٹی پارے کہ ننا ملک چاگڑدی بدلی تا چیلنج آتون مون تننگ ءِ ہراٹی آبی وسیلہ غاتا بست وبند نا ویل ہم اوار ءِ ہرا آبادی نا گرج آتے پورو کننگ خاص وڑاٹ کشاری بشخ اکن بھاز اہم و ننا زرگزران اٹ تمبہ نا حیثیت تخک۔ اوپارے کہ پاکستان و نیو میکسیکو ایکسٹریکٹیو انڈسٹری ، ہیلتھ کیئر، فارماسیوٹیکل و ٹیک سٹارٹ اپس اٹی تین پہ تینی مفاد آ تالان شریداری اس جوڑ کننگ کیرہ۔ مسعود خان ہرا نیو میکسیکو نا 3 دے ئی دورہ غاٹی ءِ، ہموڑے پاکستانی نژاد امریکی شاری محمد افضل حسین نا قتل کیس اٹی، خاص وڑاٹ تدوک آ سال پاکستانی نژاد امریکی تا پدریسہ مخ تفی آ کانگریس نا زالبول باسک میلانی سٹینز بری نا منت واری ءِ ہرفے و پارے کہ نا پدریسہ مخ تفی است ہسون واقعہ غان پد پردیسی تا پت ءِ بحال کننگ اٹ کمک کرے۔ داوخت آ میلانی سٹینز بری پارے کہ نن نیومیکسیکو ٹی پاکستانی کمیونٹی ءِ تینا دودوربیدگ نا بشخ تکنہ۔ اوپاکستانی نژاد امریکی شاری محمد افضل حسین نا قتل نا مذمت ءِ کرسا پارے کہ دااسہ مشکل ءُ وخت اس ئسک و دایقینی وڑاٹ اسہ بھاز بھلو نسخان اس ئس۔ اوتینا مہم اٹی اونا کمکاری و کمیونٹی تیکن اونا کنڈآن تروک آ کمک ءِ یات کرے۔ پاکستانی سفیر نیو میکسیکو نا بڑزکو سرکڑدہ نا ریاست اٹ اقلیت آتے مرکزی دنگ اٹ اوار کننگ کن اسہ سازگار چاگڑداس ودی کننگ نا عزم انا ستاءِ کرے۔ سفیر کانگریس نا زالبول باسک میلانی سٹینز بری ءِ دورہ ءِ پاکستان نا سلہ ہم خلک ہرادے او امنا کرے۔
