کوئٹہ۔ 05 ستمبر (اے پی پی)پاکستان یوتھ پیس موومنٹ نا سروک ارباب ناصر حیدرکاسی پارینے کہ 6 ستمبر نا دے قومی جم وجوش و جوزہ نا یات ءِ تازہ کننگ و وطن عزیز نا دفاع کن تینا جون تے ندر کننگ نا قول انا پوسکنی نا دے ءِ، 6 ستمبر 1965 ء آ ننا نرزور سلہہ بند فوج مچ آ قوم اتون اواری اٹ دشمن نا ناپاک عزم ءِ مش تا کرسا دادے ءِ مدامی کن حب الوطنی، قومی یکجہتی و ہمت و نرزوری نا اسہ تاریخ ساز دے اس جوڑ کرے۔ داڑے جاری مروک اسہ بیان اسے ٹی اوپارے کہ 6 ستمبر نادے قوم اکن اسہ تاریخی ءُ دے اسے، ہراتم ننا سلہہ بند فوج دشمن آ پیدوار کریسس کہ پاکستانی قوم و اوفتا سلہہ بند فوج تینا آجوئی نا رکھ ءِ جوانی اٹ کننگ چاہک و وطن عزیز نا سیم تا دفاع ءِ کننگ کن تینا کل ءِ ندر کننگ کن ہروخت تیارءِ۔ اوپارے کہ 6 ستمبر 1965 ء آ ننا سلہہ بند فوج و مچ آ قوم دشمن نا جارحیت نا پبی ورندی ءِ ترسا دا پک کرے کہ وطن نا دفاع کن عددی گیشتری آخا بلکن قومی یکجہتی ، جوزہ، قربانی و حب الوطنی نا جوزہ نا گرج مریک اوپارے کہ اینو نادے نن وطن نا شہید و غازی تے سلام پیش کننگ تون اوار اوار داعزم انا درشانی ءِ کینہ کہ نن تینا دا شہید و غازی تا نقش قدم آ ہنسا ملک انا شونداری و شونہالی ، سوگوی و اونا سیم تا دفاع کن ہروڑنا قربانی ایتنہ۔ اوپارے کہ پاک فوج و ایلو سیکورٹی ادارہ غاتا کارندہ غاک پاکستان آن دہشت گردی نا چٹفنگ، ملک انا سیم تا دفاع و الس نا جان و مال انا رکھ ءِ پک کننگ کن تینا جون تا نذرانہ ءِ پیش کروک شہید آتا قربانیک زیان مفسہ ملک انا دفاع کن مچ آپاکستانی قوم تینا فوج اتون ہم کوپہ سلوک ءِ اگہ کس اس ہم پاکستان نا کنڈا خراب انگا نظر اٹ ہُننگ نا کوشست کرے تو اودے پبی ورندی تننگک۔
