گلگت بلتستان اٹی امن و استحکام ءِ، سوشل میڈیا غا گمراہ کن بیانیہ و جعلی خبرآتا ریکارڈ ءِ سہی کننگ نا گرج ءِ، مرتضیٰ سولنگی

اسلام آباد۔ 03 ستمبر (اے پی پی) نگراں بنجائی وزیر حوالکاری و شینکاری مرتضیٰ سولنگی پارینے کہ گلگت بلتستان اٹی امن و استحکام ءِ، اسکول، کالج، بازار و سڑک آک ملوک ءُ، حالیت آک پرامن ءُ۔ شنبے نادے آ تینا اسہ ٹویٹ اسے ٹی اوسوشل میڈیا غا گمراہ کن بیانیہ ع جعلی خبرآتا ریکارڈ ءِ سہی کننگ نا گرج آ زور شاغسا پارے کہ گلگت بلتستان اٹی امن و استحکام ءِ، اسکول، کالج، بازار وسڑک آک ملوک ءُ، ہرا معمول نا احساس نادرشانی ءِ کننگ ءِ۔ اوپارے کہ گڑاس وخت مذہبی و فرقہ وارانہ خدشہ غاتا ردعمل اٹی پرامن برانز مریک ولے حالیت آک پورو وڑاٹ پرامن ءُ، ہموڑے فوج انا ہچ  ءُ تعیناتی اس متنے۔ اوپارے کہ پاکستان آرمی بروک آ ہفتہ حضرت امام حسین نا چہلم نا وخت آ کمیونٹی نا رکھ اکن تیار ءِ۔ نگراں بنجائی وزیر حوالکاری گلگت بلتستان اٹی بدامنی نا خبرآتے بے بنداو گوندسا پارینے کہ ہچ ءُ سم اس چلینگتنے۔ سرکاری و نجی ملکیت آتے ہچ ءُ نسخان اس رسینگتنے، برانز ہندی ویل آتیا اسہ فطری سیاسی و جمہوری عمل اسے، ہرانا گلگت بلتستان اٹی پرامن وڑاٹ بست وبند کننگا، گلگت بلتستان امن و ہم آہنگی نا جنت ءِ۔