نگراں حکومت نابجلی نا بل آتا ویل آتے ایسر کننگ و پاور سیکٹر اٹی اصلاحات بناکننگ کن گونڈ، نیامی و مریس مدتی ڈٹ اتیک، نگراں وزیراعظم انوارالحق کاکڑ نا انٹرویو

اسلام آباد۔ 03 ستمبر(اے پی پی) نگراں وزیراعظم انوارالحق کاکڑ پارینے کہ نگراں حکومت بجلی نا بل آتا ویل آتے ایسر کننگ و پاور سیکٹر اٹی اصلاحات نا بناءِ کننگ کن گونڈ، نیامی و مریس مدتی ڈٹ اتیک، حکومت بجلی نا بچت نا ڈٹ آ عملدرآمد کیک دُن کہ دیکی دنیا ٹی ہم رواج ءِ و اسلام ہم ننے دانا رغامک۔ شنبے نادے  اسہ نجی ٹیلی ویژن اسے انٹرویو ترسا او دا باوری کرفے کہ حکومت بجلی نا رکھ انا ڈٹ آ عملدرآمد کیک دُن کہ دیکی دنیا ٹی رواج ءِ و اسلام ہیل تسنے۔ بجلی نا بل آتا باندات آ السی تحریک نا بارواٹی اسہ سوج اسے نا ورندی ٹی  وزیراعظم پارے کہ خراج نا نظام نا مسخت ہزگار آتیا خراج خلنگ و نیزگار آتیا خڑچ کننگ ئس ولے داوخت آ دانظام منافع خور آتا دوٹی ءِ و ناکارہ ءِ۔ اوپارے کہ بالواسطہ خراج نا نظام نیزگارآتا بھاز انگا فریشانی تا زموار ءِ۔ ننے چندی بشخ آتیا خراج خلنگ نا گرج ئس ہراداسکان ٹیکس نیٹ اٹ اتنگتنو۔ اوپارے کہ پاکستان نا زرگزرانی حالیت جہانی مالیتی ادارہ غاتیان زہمی مسنے و ننے اوفتے تون کروک قول آتے پورو کروئی مریک۔ اومستی پارے کہ حکومت ءِ تدوک آ دہائی تیٹی پاور کمپنی تتون کروک آ معاہدہ غاتے ہم پورو کروئی ءِ۔ اوپارے کہ پاور سیکٹر و جنریشن اینڈ ٹرانسمیشن سسٹم اٹ بھاز خامی ءِ، اومستی پارے کہ بجلی نا بل آتا ویل کثیر جہتی ءِ و حکومت خراج و پاور سیکٹر نا ویل آتا بابت چندی میٹنگز کرے۔ اوباوری کرفے کہ وزارت خزانہ راج انا نزور تپہ غاتے ریلیف فراوان کننگ کن سلاہ سوج ایسونے بسنے۔ اوپارے کہ بجلی نا بل آتا باندات آ ساڑی آ مچی تا بارواٹی اونا بیان سٹی تینے آن بیان کننگا۔ اومستی پارے کہ راج انا اسہ ہندن ءُ تپہ اسے ہراڑا بجلی نا بل آتا بھاز زیات بھاریم ءِ و او مخلوق نا راجی و زرگزرانی ویل آتا پیدواری ءِ کننگ کیک دُن کہ مستین اٹ اوتینٹ دا ویل آتون مون تسنے۔ نجکاری نا بابت اَرفوک آ اسہ سوج اسے نا ورندی ٹی اوپارے کہ پاکستان انٹرنیشنل ایئرلائنز تون اوار ریاسی ادارہ غاتا نجکاری حکومت نا ایجنڈا ٹی اوار ءِ و داڑا کاریم کننگ ءِ۔