نن تینا وسیلہ غاتے کاریم اٹ اتسا شونداری نا کنڈا ہِننگ کینہ، انفارمیشن ٹیکنالوجی، کشت وکشار، دفاعی پیدوار و کانڑ کنی و معدنیات تون اوار چندی بشخ آتیٹی بے کچ وارخواہی ارے، نگراں وزیراعظم انوارالحق کاکڑ

اسلام آباد۔ 01 ستمبر (اے پی پی) نگراں وزیراعظم انوارالحق کاکڑ پارینے کہ نن تینا وسیلہ غاتے کاریم اٹ اتسا شونداری نا کنڈا ہِننگ کینہ، انفارمیشن ٹیکنالوجی ، کشت و کشار ، دفاعی پیدوار و کانڑ کنی و معدنیات تون اوار چندی بشخ آتیٹی بے کچ وارخواہی ساڑی ءِ ، زرکاری کن ڈٹ آتیا کروئی مریک، خراج وصولی نا نظام ءِ گچین کننگ نا گرج ءِ، اقتصادی وارخواہی کن پیشن نا ملک منتقلی ءِ منفی بایدے تکنگپ، مستین اٹ داوڑ مرسا کرینے، پاکستان آن ہنوک آ پاکستان نا میرات جوڑ مریرہ۔ داخیال آتا درشانی ءِ او سینئر صحافی و اینکرآتون گپ وتران کرسا کرے۔ نگراں وزیراعظم خصوصی زرکاری سہولت کونسل نا بابت سوج آتا ورندی  ءِ ترسا پارے کہ نگراں حکومت آئین نا رداٹ اسہ ہندن ءُ وخت اسے ٹی اقتدار ءِ سنبھالانے ہراتم ملک ءِ زرگزرانی چیلنج مون تروک ءِ۔ نگراں کابینہ ٹی تینا تینا بشخ آتا چاہندار ساڑی ءِ۔ دانا مسخت دادے کہ چندی بشخ آتیٹی ہراچیلنج آتا مون تروک ءِ اوفتے تون مون  تننگ مرے۔ اوپارے کہ یاسیت نا بنداو آاسہ اقتصادی عکس کشی اس کننگا۔ اوسوج کرے کہ انت واقعی پاکستان ہمو حالیت آتا گواچی ءِ ہراٹی ننا مون آ ہچ ءُ وارخواہی اس اف و خاکم بدہن نن بے سہبی اسے نا کنڈا ہِننگ اُن؟ وزیراعظم پارے کہ 70 نا دہائی نا ایسر اٹ اسرائیل اٹی افراط زر انا کچ اسہ ہزار درسد اسکان سرمسوسس۔ دنیا نا چندی ملک و قومک داوڑنا مشکل آتون مون تسنو۔ داوڑنا حالیت آتیٹی مخلوق اواری اٹ تولک ، و وارخواہی نا جاچ ءِ ہلسا حالیت آتیان پیش تمنگ نا ذریعہ پٹک۔ ہر ملک و قوم انا مشکل آک جتاوڑنا مریرہ۔ زوت آتے اٹ جوڑ کروک آ خصوصی زرکاری آسراتی کونسل اٹی منہ اہم بشخ آتا پیدواری ءِ کننگانے۔ دا بشخ آتیٹی ننکن بے پناہ وارخواہی ساڑی ءِ۔ دابشخ آتیٹی انفاریشن ٹیکنالوجی ، معدنیات و کانڑ کنی ، کشت وکشار و دفاعی پیدوار اوار ءُ۔ بلوچستان اٹی چاغی نا خڑک 5 ٹریلین یوایس ڈالر نا معدنی کوڑی ساڑی ءِ۔ اوڑاکاریم نا بناءِ کننگ کن سنگت ملک آتون گپ وتران گڈیکو ریسہ غاتیتی ءِ۔ اوکان پد اوڑاکاریم بناکننگ کیک۔ چلی، کینڈا، آسٹریلیا تون اوار چندی ملک آک تینا معدنی وسیلہ غاتے کاریم اٹ اتسا شون ہلکنو۔ بے کچ شفاف وڑاٹ نن تینا معدنی وسیلہ غاتے کاریم اٹ اتسا شون ہلنگ کینہ۔ وزیراعظم پارے کہ کشت وکشار اٹی متکن آ وڑءِ کاریم اٹ اتنگ انگ ءِ۔ ننتون بھلو ڈغار و آبی وسیلہ ارے ہرافتے کاریم اٹ اتسا بھاز بھلو آبادی اسے نا غذائی گرج آتے پورو کننگ مریک۔ ملک اٹی ماڈل فارم انا قیام نا بناءِ کننگانے۔ آئی ٹی، میڈیکل ٹورازم و دفاعی پیدوار نا بشخ آتیٹی ہم بھاز انگا وارخواہی ساڑی ءِ ہرافتیان فائدہ ہرفنگ مریک۔ نگراں وزیراعظم پارے کہ دا غٹ وارخواہی  تے مون آتخسا سجفنگ مریک کہ انت پاکستان نا آخبت روشنایا تہار ءِ؟ ولے پاکستان ءِ شونداری نا کنڈا دننگ کن ننے اواری اٹ مون آہنوئی مریک۔ بجلی بل آتیٹی ریلیف نا بابت اسہ سوج اسے نا ورندی ٹی اوپارے کہ ایف بی آر نا کٹیا جمع کننگ نا کچ ءِ ودفنگ نا گرج ءِ۔ پاور سیکٹر آن ان ڈائریکٹ ٹیکس جمع کننگ انگ ءِ۔ خراج وصولی نا نظام ءِ گچین کننگ ناگرج ءِ۔