آرمی چیف جنرل عاصم منیر نا اقوام متحدہ امن مشن ن اوزارتی دیوان نا تیاری تا جاچ کانفرنس آن تران

اسلام آباد۔ 01 ستمبر (اے پی پی) چیف آف آرمی اسٹاف جنرل عاصم منیر پارینے کہ پاکستان اسہ ہندن ءُ ڈیہہ اس خواہک ہراڑے امن مرےو واپار، ٹرانزٹ و زرکاری سویلی، دیکی و نیامی ایشیا نا غٹ ریاست آتیکن شونہالی نا سوب مرے۔ داخیال آتا درشانی ءِ او اقوام متحدہ نا امن مشن نا وزارتی دیوان نا بابت تیاری تا جاچ ءِ ہلنگ کن اڈ ہلوک کانفرنس نا ایسری سیشن اٹ بطور مہمان خاص تران کرسا کرے۔ داوخت آ وزیرخارجہ جلیل عباس جیلانی ہم تران کرے۔ جمعہ نادے آ داڑے جاری اسہ بیان اسے نا رداٹ اقوام متحدہ نا امن مشن نا وزارتی دیوان نا بابت تیاری تا جاچ ءِ ہلنگ کن دیوان اسلام آباد اٹی 30 و 31 اگست آ اڈ ہلک۔ امن مشن نا رکھ و سیکورٹی نا سرحال آ اڈ ہلوک دیوان نا اسیجائی میزبانی پاکستان و جاپان کریر۔ دیوان اٹی چندی ملک آتا مندوبین، اقوام متحدہ نا بڑزکو کمامدار و اسلام آباد اٹی سفارتی برادری نا باسک آک بشخ ہلکر۔ داوخت آ چیف آف آرمی اسٹاف جہانی امن نا بحالی ٹی اقوام متحدہ نا کڑد انا ستاءِ کرسا امن دستہ غاتے مون تروک ودوک آ چیلنج و خطرہ غاتے تالان کرے۔ اواقوام متحدہ غا زور شاغا کہ او امن مشن ءِ داقابل کے کہ اوامن مشن آ سلوک ورناتا رکھ و سیکورٹی ءِ پک کرسا پیچیدہ خطرہ غاتون مون تننگ کن پین گچین مننگ کے۔ چیف آف آرمی اسٹاف پین مون آ تخاکہ پاکستان اسہ ہندن ءُ ڈیہہ اس خواہک ہراڑے امن مرے و واپار ، ٹرانزٹ و زرکاری سویلی، دیکی و نیامی ایشیانا غٹ ریاست آتیکن شونہالی نا سوب جوڑ مرے۔ اوسلامتی کونسل و اقوام متحدہ نا سیکرٹری جنرل آن جموں وکشمیر نا ویل ءِ سلامتی کونسل نا قرارداد و کشمیری الس نا است خواہی تا رداٹ پرامن ایسری نا ہم خواست کرے۔ داکان مست انڈر سیکرٹری جنرل ڈیپارٹمنٹ  آف پیس آپریشنز کانفرنس نا میزبانی و جہانی امن کن قابل قدر کڑد ادا کننگ آ پاکستان نا منت واری  ءِ ہرفے۔ بشخ ہلوک آتیان تران کرسا وزیرخارجہ جلیل عباس جیلانی اقوام متحدہ نا امن کوشست آتیکن پاکستان نا شش دہائی آ تالان متکن آ تعلقداری تا ذکر ءِ کرے ہرا جہانی امن و سلامتی کن پاکستان نا کڑد انا پیدوار درشانی ءِ۔ وزیرخارجہ قیام امن نا عظیم مسخت اٹی تینا جون تے ندر کروک آ 171 پاکستانی تتون اوار غٹ نرزور ورنا و زالبول آتے خراج عقیدت پیش کرے۔ اواقوام متحدہ نا امن دستہ غاتیکن رکھ چاگڑد ءِ پک کننگ نا گرج آ زور شاغا ہرا مچ آدنیا ٹی  امن کن تینا خذمت ءِ سرایتک۔