اسلام آباد۔1ستمبر (اے پی پی):چیف آف آرمی سٹاف جنرل عاصم منیر ءَ گوشت کہ پاکستان یک انچیں پڑ ات کہ آھوادا ایمنی برجا بہ بیت ءُ تجارت، ٹرانزٹ ءُ سرمایہ کاری زر باری، روبرکتی ءُ نیامی ایشیا ءِ توامیں ریاست آنی واستہ وشھالی ءِ سبب جوڑ بہ بیت۔ اے ھیالانی درشانی آئی ءَ یونائیٹڈ نیشن ءِ ایمن مشن ءِ وزارت دیوان ءِ ھوالگ ءَ تیاری آنی ل سر ءَ چار ءُ تپاسی ءِ واستہ برجمیں کانفرنس ءِ گڈی سیشن ءَ ھاسیں مہمان ءِ بستار ءَ گشتانک دیگ ءَ ات۔ اے موہ ءَ وزیر ءِ درئی کار جلیل عباس جیلانیءَ ھم گشتانک دات۔ آدینگ ءِ روچ ءَ ادا جاڑی بوتگیں یک بیانے ءِ رد ءَ یونائیٹڈ نیشن ءِ ایمن مشن ءِ وزارت دیوان ءِ ھوالگ ءَ تیاری آنی سر ءَ چار ءُ بچاری زورگ ءِ واستہ دیوان اسلام آباد ءَ 30 ءُ 31 ل اگست ءَ برجم بوتگ۔ ایمن مشن ءِ رکھینگ ءُ سیکورٹی ءِ بن گپ ءَ برجم بوھوکیں دیوان ءِ میزبانی پاکستان ءُ جاپان ءَ کت۔ دیوان ءَ جتا جتائیں ملک آنی گشتانک کار، یونائیٹڈ نیشن ءِ مزن تکی کارندہ ءُ اسلام آباد ءَ سفارتی برات آنی باسک آں بھر زوری کت۔ اے موہ ءَ چیف آف آرمی سٹاف ءَ میاں اوستمانی ایمنی ءِ برجائی ءَ یونائیٹڈ نیشن ءِ کرد ءِ توسیپ ءَ کنان ءَ ایمن ٹروپ آنی لاستیں جیڈھ ءُ بیم آناں سہرا کت۔ آئی ءَ یونائیٹڈ نیشن ءِ سر ءَ زور پر دات کہ آ ایمن مشن ءَ را اے لائک جوڑ بکنت کہ آ ایمن مشن ءِ تہ ءَ استیں ورنا آنی رکھینگ ءُ سیکورٹی ءَ را دل یکیمی جوڑ کنان ءَ جیڈھ آں گوں گر ءُ چیل بوھگ ءِ واستہ گیش مھکم بوت بکن انت۔ چیف آف آرمی سٹاف ءَ گیش چمشانک دات کہ پاکستان یک انچیں پڑ ءِ لوٹ ائیت کہ آھوداس ایمنی ءِ برجائی بہ بیت ءُ تجارت ، ٹرانزٹ ءُ سرمایہ کاری زر باری، روبرکتی ءُ نیامی ایشیا ءِ توامیں ریاست آنی واستہ وشھالی ءِ سبب جوڑ بیت۔ آئی ءَ سلامتی کونسل ءُ یونائیٹڈ نیشن ءِ سیکرٹری جنرل ءَ گوں جموں کشمیر ءِ جیڈھ ءَ را سلامتی کونسل ءِ منوگری آنی رد ءُ کشمیری الس آنی واھشت آنی رد ءَ ایمنی ءَ گوں گیواری ھم لوٹ کت۔ ایشی ءَ چہ پیسر انڈر سیکرٹری جنرل ڈیپارٹمنٹ آف پیس آپریشنز آں کانفرنس ءِ میزبانی ءُ میاں اوستمانی ایمنی ءِ کوشست آنی واستہ پاکستان ءِ شست سال ءَ چہ نزیک بوھگ ءِ تران کت ایش میاں اوستمانی ایمنی ءُ سلامتی ءِ واستہ پاکستان ءِ کرد ءِ سہرائیں درور ات۔ وزیر ءِ درئی کار ءَ ایمنی ءِ برجائی ءِ واستہ وتی جان آناں قربان کنوکیں 171 پاکستانی آں ھوار توامیں دلیریں ورنا ءُ زالبول آناں توسیپ ءُ ستا پیش کت۔ آئیءَ یونائیٹڈ نیشن ءِ ایمنیں ٹروپ آنی واستہ جوانیں جاور آنی دل یکیمی کنگ ءِ ضلورت ءِ بابت ءَ زور پر دات ایش دگنیا ءَ ایمنی ءِ واستہ وتی ازمت آناں پیلو کن انت۔
