اسلام آباد۔ 31 اگست (اے پی پی) اسپیکر قومی اسمبلی راجہ پرویز اشرف تون پنچ شنبے نادے آ گوجرخان نا یونین کونسل موہڑہ نوری نا مسکوہی چیئرمین عرفان عزیز و انسپکٹر خالد محمود شیخ، چیئرمین ویلفیئر کمیٹی یوسی نڑالی ڈل اتون اوار اوڑدہی کریر ۔ قومی اسمبلی سیکرٹریٹ نا رداٹ ڈل اٹی شریک تحریک انصاف نا عہدیدار و کارندہ غاک تینا پارٹی تون تعلقداری ءِ چٹفسا پیپلزپارٹی ٹی اوار مننگ نا پڑو کریر۔ شمولیت اختیار کروک آتیٹی موہڑہ نابن جنجوعہ، یوسی موہڑہ نوری آن راجہ شکیل جنجوعہ، راجہ ماجد جنجوعہ، راجہ جمیل جنجوعہ ، راجہ عدیل جنجوعہ و راجہ پرویز جنجوعہ اوار ءُ۔ تحریک انصاف نا کارندہ غاتا پیپلزپارٹی ٹی اوار مننگ اٹ انسپکٹر خالد محود شیخ چیئرمین ویلفیئر کمیٹی یوسی نڑالی ومسکوہی چیئرمین یوسی موہڑہ نوری راجہ عرفان عزیز نا خصوصی کوشست آک اوار ءُ۔ اسپیکر قومی اسمبلی راجہ پرویز اشرف پارٹی ٹی شمولیت اختیار کروک آتے بخیر اٹ پارے۔ اوپارے کہ پی پی پی السی، سیاسی و پارلیمانی پارٹی اسے ہرا الس نا راجی آسودہی و شونداری و شونہالی آ یخین تخک، پیپلزپارٹی الس نا ویل آتے اوفتا درگہ غا ایسر کیک۔ اسپیکر اومیت نا درشانی ءِ کرے کہ بروک آ گچین کاری تیٹی پیپلزپارٹی بھلو گیشتری اسے اٹ سرسہبی دوئی کیک و حکومت جوڑ کننگ اٹ سرسہب مریک۔ اسپیکر راجہ پرویز اشرف پارے کہ گوجرخان اٹی السی راجی آسودہی نا ڈٹ آتیاکاریم برجاءِ ہرافتا زوت پوروی نا خواہندار اُٹ۔ اویونین کونسل موہڑہ نوری نا بابت ہیت کرساپارے کہ موہڑہ نوری نا الس نا خواست آتے پورو کننگ انگ ءِ، کنا گوجرخان نا الس تون بھلو تعلق اسے ، اوکنے ہراعزت و شرف ءِ تسنو ای اوفتا مدام مقروض مریوہ۔ مسکوہی چیئرمین یونین کونسل موہڑہ نوری راجہ عرفان عزیز و انسپکٹر خالد محمود شیخ یونین کونسل موہڑہ نوری آن پی ٹی آئی ءِ ہلسا پی پی پی ٹی اواری اختیار کروک آتے بخیر کرے۔ اوپارے کہ پارٹی ٹی پوسکن شمولیت اختیار کروک آتے اوفتا رواہند ءِ تننگک، اوفتا اوار مننگ آن پارٹی پین سوگو مریک۔
