اسلام آباد۔ 31 اگست (اے پی پی) نگراں وزیرخارجہ جلیل عباس جیلانی پارینے کہ پاکستان دنیا ٹی امن کن پبی کڑد ادا کرینے، پاکستان اقوام متحدہ نا امن مشن اٹ کڑد ادا کننگ کن سنبرینگوک ءِ۔ داخیال آتا درشانی ءِ او پنچ شنبے نادے آداڑے اقوام متحدہ نا امن مشن نا 2 دے ئی وزارتی دیوان آن تران کرساکرے۔ اوپارے کہ پاکستان مدام بے چیٹی نا گواچی علاقہ غاتیٹی امن کن اقوام متحدہ تون اواری اٹ اہم کڑد ادا کرینے، امن مشن نا کاریم نا کچ اٹی ودکی کن گام گیج کروئی مریک۔ نگراں وزیر خارجہ جلیل عباس جیلانی دود اٹی شریک مندوبین تے بخیر اٹ پارسا پارے کہ اقوام متحدہ نا مشن دنیا ٹی امن کن کوشست کننگ ءِ، امن مشن نا بشخ مروک آ کارندہ غاتا طبی امداد کن ہم گام گیج مرے، رسمی امن نا جاگہ غا پوسکن آ وڑڑتیا پین کاریم کننگ نا گرج ءِ۔ اوپارے کہ امن مشن نا سرسہبی نا سیبو کثیر جہتی و مربوط عوامل آتیا تالان ءِ۔ پاکستان 30 و 31 اگست آ اسلام آباد اٹی اقوام متحدہ نا امن مشن نا بروک آ دیوان نا تیاری نا دیوان نا مہمانداری ءِ کرے ہرانا سرحال ’’اقوام متحدہ نا امن دستہ غاتا رکھ وسلامتی ‘‘ ءِ۔ جاپان دا دیوان نا شریک میزبان ءِ ہرا پاکستان نا غٹ آن بھلا ہیلکاری ادارہ سینٹر فار انٹرنیشنل پیس اینڈ سٹیبلیٹی (سی آئی پی ایس) اٹی اڈ ہلک۔ دیوان اٹی 156 ملک آتیا تالان اقوام متحدہ نا خصوصی کمیٹی پیس کیپنگ آپریشن اٹی نمائندگی کروک آباسک ملک آتیان بیدس ہندی وجہانی چاہندار آک بشخ ہلکر۔ اقوام متحدہ نا سیکرٹریٹ نا سینئر کمامدارآک دیوان اٹی شریک مسر۔ اِرادے ئی دیوان اٹی چندی ذیلی سرحال آتیاپینل ڈسکشن اڈتننگا ہرافتے ٹی صلاحیت سازی نا گرج، جہانی کانود نا نقطہ نظر آن اقوام متحدہ نا امن فوجی تا رکھ ، اقوام متحدہ نا امن مشن نا طبی لائخی تے ودفنگ آن بیدس ٹیکنالوجی و اسٹریٹجک مواصلات آن فائدہ ہرفنگ آ سجفنگ اوار ءِ۔
