سرینگر۔ 31 اگست (اے پی پی) کشمیر نامزاحمتی تحریک نا سرکڑدہ راہشون سید علی گیلانی نا ارٹ میکو برسی آ اودے خراج عقیدت پیش کننگ کن کل جماعتی حریت کانفرنس نا کال آ پگہ (یکم ستمبر) آ بھارت نا غیرکانودی کوزہ ٹی جموں وکشمیر نا گرمائی دارالحکومت سری نگر نا حیدرپورہ نا کنڈا مارچ کننگک۔ کشمیر میڈیا سروس نا رداٹ سید علی گیلانی یکم ستمبر 2021 آ سرینگر اٹی تینا ہنکین آ نظربندی ٹی کزیت کریسس ہراڑے کوزہ گیر بھارتی انتظامیہ اودے 2010آن پدریسہ نظر بند کریسس۔ ایلو تنظیمک مارچ انا کال نا مخ تفی ءِ کرینو۔ عالم دینک حریت قائد و ایلوکشمیر نا شہید آتا درجہ گاتا بڑزی کن مسیت آتیٹی خصوصی دعا کرفرہ۔ کنٹرول لائن نا ہڑتوم آ پلو و مچ آ دنیا ٹی رہینگوک کشمیری جہانی برادری نا چکار ءِ مقبوضہ علاقہ ٹی بھارتی ظلم انا کنڈا کرفنگ کن برانزی مچی اس کیرہ۔ کل جماعتی حریت کانفرنس ناراہشونک بزرگ حریت قائد ءِ خراج عقیدت پیش کرسا پارینو کہ سید علی گیلانی صداقت ودیانت نا درشانی ئسک، ہرا تینا مچ آ زند ءِ کشمیر ناکاز اکن وقف کرے۔
