اسلام آباد۔ 31 اگست (اے پی پی) نگراں بنجائی وزیر واپار، صنعت وپیدوار ڈاکٹر گوہر اعجاز تون سعودی عرب نا سفیر نواف بن سعید احمد المالکی اوڑدہی کرے، تین پہ تینی است خواہی و ہڑتوم آ کنڈآتا کمکاری ناامور نا بارواٹی گپ وتران کریر۔ پنچ شنبے نادے آ وزارت واپار، صنعت و پیدوار آن جاری بیان نا رداٹ اوڑدہی ٹی سفیر نواف ڈاکٹر گوہر ءِ اونا ساڑی آ تقرری آ مبارکبادی پیش کرے۔ ڈاکٹر گوہر ہڑتوم آ ملک آتا نیام اٹ سوگو تاریخی تعلقداری تا بارواٹی گپ وتران کرسا پاکستان نا زرگزرانی سوگوی و شونداری ٹی سعودی عرب نا پدریسہ مخ تفی آ منت واری ءِ ہرفے۔ اوسعودی عرب ناسرکڑدہ نا بصیرت نا ستاءِ کرسا سفیر نواف ءِ پاکستان نا بدل مفروک شریداری و پت انا باوری کرفے۔ سفیر سعودی عرب و پاکستان نا نیام اٹ برادرانہ رشتہ غا زور شاغا ہراٹی تین پہ تینی پت انا چندی ہڑتوم آ کنڈ و علاقائی باندات آتیا کمکاری ءِ۔ اوملک انا واپاری گمان تے ودفنگ کن وزیر نا کوشست آتا ہم ستا ءِ کرے۔ اوڑدہی ٹی ڈاکٹر گوہر اعجاز سفیر نواف ءِ وزارت واپار اٹی بخیر کرسا خیرخواہی ناوڑاٹ اسہ سووینئر اس ہم پیش کرے۔
