اسلام آباد۔ 30 اگست (اے پی پی) چیئرمین سینیٹ محمد صادق سنجرانی پارینے کہ مچ آ ملک اٹی اسہ وڑ شونداری نا وارخواہی تا فراوانی ءِ پک کننگے، چین پاکستان اقتصادی راہداری و خاص وڑاٹ گوادر بندرگاہ غان پبی فائدہ ہرفنگے۔ داخیال آتا درشانی ءِ او نگراں بنجائی وزیر کامرس، صنعت وپیدوار ڈاکٹر گوہر اعجاز تون گپ وتران کرسا کرے ہرا چارشنبے نادے آ پارلیمنٹ ہاؤس اٹی اوڑدہی کرے۔ اوڑدہی ٹی زرگزران نا بحالی و الس ءِ المی ریلیف فراوان کننگ نا گرج آ زور شاغنگا۔ اوڑدہی ٹی چیئرمین سینیٹ پارے کہ مچ آ ملک اٹی اسہ وڑ شونداری نا وارخواہی تا فراوانی ءِ پک کننگے۔ چین پاکستان اقتصادی راہداری و خاص وڑاٹ گوادر بندرگاہ غان پبی فائدہ ہرفنگے۔ چیئرمین سینیٹ پارے کہ پائیدار شونداری ءِ مون آ دننگ و پدسلوک علاقہ غاتا شونداری و مخلوق نا زند انا آب ءِ گچین کننگ کن گام گیج کننگ نا گرج ءِ۔ نگراں بنجائی وزیر چیئرمین سینیٹ نا کنڈآن زرگزرانی بحالی نا بابت تروک آ سلاہ تا ستاءِ کرے و اوفتا منت واری ءِ ہرفے۔ نگراں بنجائی وزیر بریبر شونداری ءِ پک کننگ کن گچین گام گیج آتا باوری کرفے۔ نگراں بنجائی وزیر صوبہ بلوچستان نا پسماندہ علاقہ غاتا شونداری کن پبی عزم انا درشانی ءِ کرے۔
