اسلام آباد۔ 30 اگست (اے پی پی) نگراں بنجائی وزیر قومی جان جوڑی ڈاکٹر ندیم جان پارینے کہ الس ءِ جا ن جوڑی نا بنداوی آسراتی فراوان کننگ ریاست نا زمواری ءِ ، پولیو نا چٹفنگ نا پورو عزم کرینن۔ داخیال آتا درشانی ءِ او نگراں صوبائی وزیر جان جوڑی پنجاب ڈاکٹر جاوید اکرم تون گپ وتران کرسا کرے ہرا چارشنبے نادے آ داڑے اوڑتون اوڑدہی کرے۔ ہڑتوم آ وزیرآک جان جوڑی نا بشخ انا شونداری و گچینی کن تین پہ تینی گپ وتران کریر و داعزم انا درشانی ءِ کریر ، الس نا راجی آسودہی کن اسہ ایلو تون کمکاری ءِ برجاتخنہ۔ داوخت آ ڈاکٹر ندیم جان پارے کہ چنکو وخت اسے ٹی جان جوڑی نا بشخ انا شونداری نا مربوط پلان اس ایسونٹ۔ ہسپتال آتا کارکڑد ءِ ودفنگ کن مربوط حکمت عملی اس جوڑ کننگ اٹی اُٹ۔ پولیو نا چٹفنگ نا پکا عزم کرینن۔ اوپارے کہ الس ءِ جان جوڑی نا آسراتی فراوان کننگ ریاست نا زمواری ءِ۔ یونیورسل ہیلتھ کوریج ءِ پک کننگ کن گچین گام گیج ٓتے پک کننگ اٹی اُٹ۔ چندی مرض و دین تیان بچنگ کن مربوط گام گیج برجا ءِ۔ اوڑدہی ٹی صوبائی نگراں وزیر جان جوڑی ڈاکٹر جاوید اکرم بنجائی وزیر جان جوڑی ڈاکٹر ندیم جان ءِ وزارت نا قلمدان ءِ سنبھالنگ آ اودے مبارکبادی تس و پارے کہ جہانی شہرت یافتہ ماہر جان جوڑی نا تعیناتی ہیلتھ انا بشخ اکن فائدہ ئی جوڑ مریک۔ اوپارے کہ وزیراعلیٰ پنجاب سید محسن نقوی نا ویژن نا رداٹ الس اسکان جان جوڑی نا گچین آسراتی فراوان کننگ کن کوشست کننگ اُن۔ پنجاب نا غٹ کارڈیالوجی ہسپتال آتیٹی مریض آتے پرائمری انجیوپلاسٹی نا 7/24آسراتی فراوان کننگانے۔ پنجاب نا سرکاری ٹیچنگ ہسپتال آتا حالیت آتے گچین کننگ نا پورو کوشست کننگ اُن۔ ڈاکٹر جاوید اکرم پارے کہ پاکستانی الس ءِ خطرناک ناجوڑی تیان بچفنگ کن پوسکن آ ریسرچ آ چکار کروئی مریک۔ پنجاب اٹی جان جوڑی نا بشخ اٹی آرٹیفشل انٹیلی جنس نا نظام اس درستی راستی کرفنگانے۔ الس نا خراج آتیان جوڑ مروک آ سرکاری ہسپتال آتے الس کن سودمند کننگ خوانہ۔ پنجاب نا طبی درسگاہ تیٹی کوالٹی ریسرچ آ خاص چکار کننگ انگ ءِ۔ پنجاب نا نگراں حکومت نا ہچ ءُ سیاسی ایجنڈا اس اف۔ پنجاب نا نگراں حکومت تینا چکار ءِ بیرہ الس نا گچینی آ تخانے۔
