اسلام آباد۔ 30 اگست (اے پی پی) بنجائی وزارت قومی جان جوڑی پارینے کہ نگراں بنجائی وزیر ڈاکٹر ندیم جان نا پارت آ وزارت تمباکو نوشی نا توننگ نا کانود نا خلاف ورزی آ ایکشن ہلنگ نا فیصلہ کرینے، حکومت سگریٹ نوشی نا توننگ کن گچین گام گیج آتے پک کننگ ءِ۔ چارشنبے نادےا ٓ تینا بیان اٹی ترجمان پارے کہ سگریٹ ساز کمپنی تے کانود نا خلاف ورزی آ ہم نوٹس جاری کننگک، چندی کمپنیک سگریٹ نا اشتہاری و فروغی مہم اٹ اوار ءُ ہرافتے وزارت 10 دے انا تہہ ٹی نوشتہی وضاحت تننگ نا پرمان کرینے، است جم مفروک ورندی نا دروشم اٹ پین کانودی کارروائی نا وارننگ تننگک۔ اوپارے کہ فلپ مورس، خیبرٹو بیکو کمپنی، سیمسن گروپ، نیشنل ٹوبیکو کمپنی، یونیورسل ٹوبیکو کمپنی، سول ٹوبیکو کمپنی، وطن ٹو بیکو کمپنی، رائل ٹوبیکو کمپنی و سووینیتر ٹو بیکو کمپنی ءِ نوٹس جاری کننگانے۔ اونا پاننگ ئس کہ تمباکو نوشی نا توننگ نا کانود نا رداٹ سگریٹ نوشی نا اشتہاری مہم و پروموشن تا اسکیم تیا پابندی ءِ ، خلاف ورزی نا دروشم اٹ جرمانہ و بندی نا سزا مننگ کیک۔ ترجمان پارے کہ حکومت سگریٹ نوشی نا توننگ کن گچین گام گیج آتے پک کننگ ءِ۔ اونا پاننگ ئس کہ الس نا جان جوڑی و راجی آسودہی کن عملی گام گیج آتے پک کننگ ءِ۔
