اسلام آباد۔ 30 اگست (اے پی پی) چیئرمین سینیٹ محمد صادق سنجرانی دریائے ستلج اٹی نوکاپی ریلہ نا سوب آن سویلی پنجاب نا چندی علاقہ غاتیٹی مروک آ جانی و مالی نسخان تیا ڈکھیائی و است ہسونی نا درشانی ءِ کرینے۔ چیئرمین سینیٹ ضلعی انتظامیہ، ڈیزاسٹر مینجمنٹ و ریسکیو کمامدار آتے پارت جاری کرے کہ نوکاپ زہمی تے دمدستی امداد فراوان کیر و غٹ رابطہ سڑک آتا بحالی کن ہلہلہ ئی بنداو تیا گام گیج و شیفکو علاقہ غاتا آبادی تا رکھ جاگہ غاتیا گدریفنگ کن دمدستی بست وبند کننگے۔ چیئرمین سینیٹ نوکاپی حالیت آتون مون تننگ کن فوج و صوبائی نگراں حکومت آتا کوشست آتا ستاءِ کرے۔ چیئرمین سینیٹ نوکاپی علاقہ غاتا رہینگوک آتا ہرممکن امداد ءِ کننگ نا پارت ہم جاری کرے۔ چیئرمین سینیٹ نوکاپی دیر تا نتیجہ ٹی زوال کروک آ بندغ آتا درجہ غاتا بڑزی و ٹھپی تا زوت دراخ جوڑی کن دعا کرے۔ ڈپٹی چیئرمین سینیٹ سینیٹر مرزا محمد آفریدی ہم بھارت نا کنڈآن دریائے ستلج اٹی نوکاپی دیر انا نتیجہ ٹی سویلی پنجاب نا چندی علاقہ غاتیٹی نوکاپی دیر تیان مروک آ جانی و مالی نسخان تیا ڈکھیائی و است ہسونی نا درشانی ءِ کرینے۔
