پاکستان نا زرگزرانی آخبت روشناءِ و دا مزل نا دوئی کننگ گچین ڈٹ بندی و سہی گام گیج آتا کمک اٹ بھلو دشواری اسے آن بیدس ممکن ءِ، چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر عبدالقادر

کوئٹہ۔ 30 اگست (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر عبدالقادر اسہ خصوصی بیان اسے ٹی پارینے کہ قومی زرگزران ناقابل سگ وام تا بھاریم، پدریسہ ودوک آ واپاری نسخان ، زرمبادلہ نا گنج اس مفننگ کوڑی و قومی کرنسی نا پدریسہ گراوٹ نا سوب آن بے یقینی نا ہرا مین اٹ اختہ مسنے اوڑان نجات کن کاروباری حلقہ و الس اٹ پبی حقائق نا بنداو آ دا پت ودی کننگ المی ءِ کہ پاکستان نا زرگزرانی آخبت روشناءِ و دا مزل نا دوئی کننگ گچین ڈٹ بندی و سہی گام گیج آتا کمک اٹ بھلو دشواری اسے آن بیدس ممکن ءِ۔ اوپارے کہ ملک ءِ چلیفنگ کن 80 آن 100 ارب ڈالر نا گرج ءِ، نن ریفارم آتا کمک اٹ ملکی درآمد آتے 80 ارب ڈالر اسکان سرکننگ نا ہدف بھاز زوت دوئی کننگ کینہ، صنعت ءِ سبسڈی نا گرج اف، توانائی نا پدریسہ فراوانی آن پیدواری عمل  ءِ بھاز جوان کننگ مریک۔ اینو ملک مشکل حالیت آتا گواچی ءِ داحالیت آتا مون ءِ توننگ ہر پاکستانی نا زمواری ءِ ، خاص وڑاٹ صنعت و واپار تون وابستہ مثبت پالیسی تیا عملدرآمد کرسا ملک ءِ سوگوی تننگ کینہ، اوپارے کہ ہمو صنعت ہرا جی ایس ٹی ٹی رجسٹرڈ افس اوفتے ٹریک اینڈ ٹریس سسٹم نا کمک اٹ رجسٹر کننگے۔ سالانہ 80 آن 100 ارب ڈالر نا برآمدات کننگ ہچ ءُ بھلو ہیت اس اف، علاقائی واپار نا مون آ دننگ آن نن تینا برآمد آتیٹی خاطرخواہ ودی کرسا تینا زرگزران ءِ سوگو کننگ کینہ، داسہ وخت بسنے کہ صنعت و واپار تون وابستہ بندغ آک داہدف نا دوئی کننگ کن تینا پبی کڑد ءِ ادا کیر و حکومت ءِ تینا نہادی سلاہ ہم پیش کیر تانکہ غٹ صنعت آتیٹی زرکاری کروک آبھلا بھلا بزنس گروپ ہم ملک انا اقتصادی سرجزآتیٹی بشخ ہلسا ملکی زرگزران ء، سوگو کرسا گمر محسوس کیر، اومستی پارے کہ پاکستان اٹ سرسہب ماہرین معاشیات و کاروباری نیاڑی و نرینہ غاتا کمتی اف، اسہ بھلو سلابتی دیوان اس بٹنگے تانکہ ملک انا چیدہ چیدہ سرسہب کاروباری شخصیت آتا سلاہ و آزموندہ غاتیان فائدہ ہرفسا پاکستان نا ہمہ جہت صنعت و واپار ءِ پین گچین کرسا سرسہبی آن ہمکنار کننگ مرے۔ پاکستان نا قابل فخر سپوت مچ آ دنیا ٹی تینا لائخی و سرسہبی تے منفینو۔ ہندا پاکستان نااصل دروشم ءِ، حکومت وخت پاکستان نا تعمیراتی کمپنی، ٹیکسٹائل ، اسپورٹس، سرجیکل ، فارماسیوٹیکل، کشاری مصنوعات ، ہوزری الیکٹرک و الیکٹرانک اپلائی اینسز و ایلو مصنوعات آتے مون آ درسا ملک ءِ نیزگار ی و افلاس نا تنکی تیان بھاز زوت کشنگ کیک۔