اسلام آباد۔29اگست (اے پی پی): ادارکی بنجاھی وزیر ءُ نیک راھی کار انیق احمد ءَ سئے شمبے ءَ سعودی سفیر نواف سعید المالکی ءَ گوں گند ءُ نند کت۔ دوئیں سروک آ نی نیام ءَ مرچی حج انتظامی ، وت مہ وتی کار ءُ مسلمان آنی استیں جیڈھ آنی گیواری ءِ واستہ تران کنگ بوت۔ گند ءُ نند ءَ سیکرٹری نیک راھی کار آفتاب اکبر درانی ءُ رابطہ عالم اسلامی ءِ ریجنل ڈائریکٹر سعد بن مسعود الحارثی ھم شریک ات۔ وزیر ءِ نیک راھی کار انیق احمد ءَ گوشت کہ سعودی عرب ءِ گوما شرپ ءُ ازت ءُ وت مہ وتی است انت۔ منی مشن انت کہ اے لکوکیں وھد ءُ پاس ءَ پاکستانی حاجی آناں گیش آسراتی بدیاں۔ سعودی سفیر برات ءُ شرپ مند انت، آوانی ھمک رنگیں کمک ءُ ھمبراہ داری ءَ کناں۔ آئی ءَ سعودی سفیر ءَ را گوشت کہ وزارت ءِ نیک راھی کار باندات چار شمبے ءَ ءَ اسلام آباد ءَ نیک راھ آنی وت مہ وتی یکوئی کانفرنس ءِ بند ءُ بست ءَ کنگ ءَ انت ایشی ءِ تہءَ توامیں نیک راھ آں گوں سیادی داروکیں سروک، سفیر ءُ سول سوسائٹی ءِ سروک آنی گوما باست ءُ واستہ ءُ تران کنگ بیت۔ آئی ءَ گیش تران کنان ءَ گوشت کہ وزارت ءِ نیک راھی کار روایتی شرپ ءُ ازت ءِ گوما 12 ربیع الاول ءَ راجی سیرت کانفرنس بست ءُ بند کنگ ءَ انت۔ اے سال ءَ کانفرنس ءِ سرھال “سیرت طیبہ ءِ ردءَ ملکی معاشی برجائی ءِ گامگیج ” منوگر کنگ بوتگ۔
