اسلام آباد۔ 29 اگست (اے پی پی) نگراں بنجائی وزیر قومی جان جوڑی ڈاکٹر ندیم جان پارینے کہ پاکستان یورپی یونین نا تعلقداری تے قدر انا نظر اٹ ہرک ، یورپی یونین نوکاپ زہمی تا بحالی ٹی پبی تفے، نگراں وزیراعظم نا کماشی ٹی پاکستان نا شونہالی و زرگزران نا گچینی ننا ایجنڈا ءِ۔ داخیال آتا درشانی ءِ او یورپی یونین نا سفیر ریناکیونکاتون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی جان جوڑی نا بشخ و تین پہ تینی است خواہی نا امور آ گپ وتران کننگا۔ اوڑدہی ٹی صوبائی وزیر جان جوڑی ڈاکٹر جاوید اکرام وسیکرٹری جان جوڑی افتخار علی شلوانی ڈی جی ہیلتھ ئسک ہم ساڑی ئسر۔ سفیر نگراں وزیر جان جوڑی نا قلمدان ءِ سنبھالنگ آ مبارکبادی ترسا پارے کہ پولیو نا چٹفنگ نا کوشست آتیٹی نما خذمت آتے دنیا قدر انا نظر اٹ ہرک۔ اوپارے کہ جان جوڑی نا تین پہ تینی است خواہی نا بشخ آتیٹی کمکاری برجاسلک۔ اوڑدہی ٹی نگراں بنجائی وزیر ڈاکٹر ندیم جان پارے کہ پاکستان یورپی یونین نا تعلقداری تے قدر انا نظر اٹ ہرک۔ یورپی یونین نوکاپ زہمی تا بحالی ٹی پبی تفے، اوپارے کہ نگراں وزیراعظم نا کماشی ٹی پاکستان شونہالی و زرگزران نا گچینی ننا ایجنڈا ءِ۔ وزارت نا قلمدان ءِ سنبھالنگ تون اوغانستان نا ہیلتھ منسٹر ءِ چٹھی اس نوشتہ کرینن و پاکستان آ بننگ نا سلہ خلکونن۔ ڈاکٹر ندیم جان پارے کہ پولیو نا چٹفنگ کن بارڈر آ اسیجائی مربوط حکمت عملی اس ٹہیفنگے۔ ہراتم اسکان اوغانستان آن پولیو نا خاتمہ مفک پاکستان اٹ رسک ساڑی سلک۔ اوغانستان آن پاکستان بھلو کچ اسے ٹی ہن و بربرجاسلک۔ اوپارے کہ پاک اوغان بارڈر آ دین نا توننگ کن مربوط پلان اس جوڑ کننگ اٹی اُٹ۔ بارڈر آ پولیو ویکسی نیشن نا نظام ءِ ہلہلہ ئی بنداو تیا سوگو کننگ اٹی اُٹ۔ تینا 60 درسد وخت ءِ پولیو نا چٹفنگ کن وقف کرینٹ۔ گلوبل ہیلتھ سیکورٹی ایجنڈا نا پوروی کن سنبرینگوک اُن۔ پاکستان زوت گلوبل ہیلتھ سیکورٹی ایجنڈا آ بڑزکو کہولی دیوان نا مہمانداری ءِ کیک ۔ دیوان اٹی مچ آ دنیا غان چاہندار و اسٹیک ہولڈر آک بشخ ہلیرہ۔ ڈاکٹر ندیم جان یورپی یونین نا سفیر ءِ گلوبل ہیلتھ سیکورٹی سمٹ اٹ بشخ ہلنگ نا سلہ خلک۔ اوپارے کہ ناجوڑی و دین تتون مون تننگ کن بارڈر ہیلتھ سروسز ءِ سوگو کننگ انگ ءِ۔ پرائمری ہیلتھ کیئر سسٹم ءِ سوگو کننگ انگ ءِ۔ یونیورسل ہیلتھ کوریج ننا ٹاپ آ ایجنڈا ءِ۔ پاکستان اٹ نیوٹریشن پروگرام آ ہم گپ وتران مس۔ نیوٹریشن اہم ءُ باندات اسے اونا مون ءِ توننگ کن مربوط گام گیج کننگ انگ ءِ۔
