اسلام آباد۔ 29 اگست (اے پی پی) اسپیکر قومی اسمبلی راجہ پرویز اشرف تون چیئرمین سیلانی ویلفیئر ٹرسٹ مولانا بشیر فاروق ٹرسٹ انا ایلو باسک آتون اوار اوڑدہی کرے۔ سے شنبے نادے آ قومی اسمبلی سیکرٹریٹ نا رداٹ اوڑدہی ٹی اومیتدار صوبائی اسمبلی خرم پرویز راجہ ہم ساڑی ئسک۔ اوڑدہی ٹی سیلانی ویلفیئر ٹرسٹ انا کنڈآن الس نا راجی آسودہی و اوفتے زند انا بنداوی آسراتی تا فراوانی کن کروک آ چندی گام گیج آتیا سرجمی اٹ گپ وتران کننگا۔ چیئرمین سیلانی ویلفیئر ٹرسٹ مولانا بشیر فاروق اسپیکر قومی اسمبلی ءِ سیلانی ویلفیئر ٹرسٹ انا نیامی تپہ غاتا راجی آسودہی کن کروک آ گام گیج آتا بابت سرجمی اٹ حوال تس۔ اوپارے کہ سیلانی ویلفیئر ٹرسٹ انا کنڈآن ہڑدے ئی بنداو آ کم وود 4 لکھ حقدار بندغ آتے کن وخور نا فراوانی، لکھ آ ورناتیکن انفارمیشن ٹیکنالوجی(آئی ٹی ) ٹریننگ، میڈیکل اسسٹینس، زالبول آتیکن ووکیشنل ٹریننگ سینٹرز، واٹر فلٹریشن پلانٹ آتون اوار الس ناآسودہی نا ایلو گام گیج آتے ہرفنگ انگ ءِ۔ اسپیکر قومی اسمبلی راجہ پرویز اشرف سیلانی ویلفیئر ٹرسٹ نا بھلو کچ اسے آ انسانیت نا خذمت و راجی آسودہی کن کروک آ تام گیج آتا ستاءِ کرے۔ اسپیکر پارے کہ سیلانی ویلفیئر ٹرسٹ اان راج انا اختہ مروک تپہ غاتا امداد ناجوزہ ستاکڑزک۔ اوپارے کہ لکھ آ بندغ آتے کن و خور نا فراونی مرے، آئی ٹی نا بشخ اٹی لکھ آ بندغ آتا ٹریننگ نا عمل مرے یا زالبول و ورناتے خودکفیل جوڑ کننگ کن ووکیشنل ٹریننگ انسٹی ٹیوٹس نا جوڑ کننگ سیلانی ویلفیئر ٹرسٹ راج انا شونداری و الس نا شونہالی نا سفیر اٹ مدام نمان کڑد ادا کرینے۔ اسپیکر پارے کہ داوڑنا گام گیج آتیان الس نا خذمت تون اوار اوار سیلانی ویلفیئر ٹرسٹ ملکی زرگزران نا گچینی ٹی ہم بشخ شاغنگ ءِ۔ اسپیکر قومی اسمبلی سیلانی ویلفیئر ٹرسٹ نا ووکیشنل ٹریننگ سینٹرز، میڈیکل اسسٹنس وواٹر فلٹریشن پلانٹ کون آ گام گیج آتا دنگ ءِ گوجرخان تون اوار مچ آ ملک انا پسماندہ علاقہ غاتسکان ودفنگ نا پارے تانکہ گوجرخان تون اوار ملک انا ایلو مر مر انگا پسماندہ علاقہ غاتا الس ہم فائدہ ہرفنگ کے۔ اوپارے کہ سیلانی ویلفیئر ٹرسٹ نا داوڑنا گام گیج آتا سوب آن دنیا ٹی پاکستان نا پرامن تشخص تالان مننگ ءِ۔ اسپیکر مولانا بشیر فاروق، چوہدری اختر و ڈاکٹر امجد ثاقب کون آ انسانیت نا آسودہی کن کاریم کروک آ شخصیت آتا ملک و قوم اکن پیش کروک آ خذمت آتا ستاءِ کرسا پارے کہ انسانیت نا خذمت و راجی آسودہی نا جوزہ غان سرشار شخصیت آک اللہ تعالیٰ غان بھاز خڑک مریرہ۔ اوپارے کہ دنیا ٹی انسانیت نا خذمت و راجی آسودہی عظیم ءُ مسخت اسے و دا مسخت نا دوئی کننگ اٹ دا شخصیت آتا جہد نا ہچ ءُ درور اس ملپک۔ اسپیکر انسانیت نا خذمت نا دا عظیم مسخت اٹ تینا کنڈآن ہر ممکن کمکاری نا باوری کرفے۔
