اسلام آباد۔ 29 اگست (اے پی پی) اسپیکر قومی اسمبلی راجہ پرویز اشرف تدوک آ نن لکی مروت اٹی پولیس موبائل آ جلہو نا مذمت ءِ کرسا تعلقدار کمامدارآتے ٹھپی پولیس کارندہ غاتے گچین طبی آسراتی فراوان کننگ نا پارت کرینے۔ سے شنبے نادے آ تینا مذمتی بیان اٹی اسپیکر جلہو و سم کاری ٹی اِراپولیس کارندہ غاتا جانی نسخان آ ڈکھیائی وا ست ہسونی و شہید کارندہ غاتا خاہوت تون ہمدردی و ہڑزخواہی نا درشانی ءِ کرے۔ اسپیکر پارے کہ ملک اٹی امن کن پولیس فورس انا قربانی تے است آن دننگ مفک۔ پولیس فورس آ لغوری جلہو دہشت گردی نا برخلاف اوفتا عزم ءِ متزلزل کننگ کپک۔ اسپیکر شہید آتا درجہ غاتا بڑزی، ٹھپی تا زوت دراخ جوڑی و پسماندگان تے دا بے بدل نسخان ءِ سگنگ کن صبر وجمیل عطاکننگ نا دعاکرے۔
