نوکاپ آن پیشگی خبڑدار کننگ نا نظام ءِ گچین کرسا نسخان تیان بچنگ مریک، احمد عرفان اسلم

اسلام آباد۔ 29 اگست (اے پی پی) نگراں بنجائی وزیر آبی وسیلہ احمد عرفان اسلم پارینے کہ نوکاپ نا بھسکاری تیان بچنگ کن فول پروف بست وبند آتا گرج ءِ ، ایشیائی شونداری بینک انا کمک اٹ فلڈ مینجمنٹ ڈٹ آ کاریم ءِ مون آ دننگ اٹ کمک رسینگانے، تدوک آ 20 سال اٹی دنیا ٹی قدرتی آفت آتیان 2.9 ٹریلین ڈالر نا نسخان مسنے، نوکاپ آن مروک آبھسکاری آن پیشگی خبڑدار کننگ نا نظام ءِ گچین کرسا بھلو کچ اسے آ نسخان تیان بچنگ مریک۔ داخیال آتا درشانی ءِ او سے شنبے نادے آ داڑے ’’قومی ماسٹر پلان فلڈ ٹیلی میٹری‘‘ نا اجرانا دود آن تران کرسا کرے۔ دود آن تران کرسا نگراں بنجائی وزیر پارے کہ نوکاپ آن ہر سال بھاز نسخان مریک۔  نوکاپ آن بچنگ کن رکھی گام گیج بے کچ المی ءِ۔ داڑتون اواراوار ڈغار اٹی دیر انا کچ اٹی ہم کمتی مسنے۔ 2010اٹی ملک اٹی بھاز بھلو نوکاپ اس بس ہراڑان نن بھاز بھسکاری خنان۔ 80و90نا عشرہ غاتیٹی ہم نوکاپ آن بھاز نسخان مس۔ تدوک آ 20 سال اٹی دنیا ٹی قدرتی آفت آتیان 2.9 ٹریلین ڈالر نا نسخان مس ہرافتیان 55 درسد نسخان نوکاپ آن مون آ بسنے۔ پاکستان اٹ نوکاپ آن داتم اسکان جم وڑاٹ 100 ارب ڈالر نا نسخان مسنے و بیرہ تدوک آ سال مروک آ نسخان نا کساس 30 ارب ڈالر ءِ۔ دا بےکچ تشویشناک  حالیت ءِ۔ نوکاپ نا بھسکاریک ملک ءِ بھاز نسخان تسنو۔ اوپارے کہ اگہ ننے زرگزرانی بشخ ءِ سوگو کروئی ءِ و مون آ ہنوئی ءِ تو نوکاپ نا حالیت آتون مون تننگ و نوکاپ آن بچنگ کن جوان ڈٹ بندی کروئی مریک۔ دا چرجوئی ٹی  اینو نا دا دود بھازاہمیت تخک داڑان ننے تینا ڈٹ بندی ءِ گچین کننگ اٹ کمک رسینگک۔ اوپارے کہ نوکاپ آن مروک آ بھسکاری آن پیشگی خبڑدار کننگ نا نظام ءِ گچین کرسا بچنگ مریک ولے دا کاریم گچین ٹیلی میٹری سسٹم آن بیدس مننگ کپک۔ اوپارے کہ دا چرجوئی ٹی فیڈرل فلڈ کمیشن نا کڑد بھاز اہمیت تخک و ایشیائی شونداری بینک و فیڈرل فلڈ کمیشن نا نیام اٹ شریداری کار ستاکڑزک۔ نوکاپ نا بھسکاری تیان بچنگ کن فول پروف بست وبند کروئی مریک۔ داڑکن حکومت پورو وڑاٹ سنبرینگوک ءِ۔ 2022اٹی بروک آ نوکاپ نا نسخان تیان سبخ اس ہلسا حکومت نوکاپ آن رکھ انا پلان ءِ گچین کننگ نا فیصلہ کرینے و داڑکن ایشیائی شونداری بینک  انا کمک ستاکڑزک و داڑکن ایکنک 194 ارب روپئی آن زیات نا پی سی ون نا منظوری ءِ تسنے۔ دا نوکاپ آن بچنگ کن حکومتی عزم انا ڈیک ءِ۔ دانا مسخت دادے کہ مخلوق نا زند و اوفتا کاروبار ءِ رکھ کننگ مرے۔ اومیت ءِ کہ دا ورکشاپ نا اڈتننگ آن نوکاپ آن بچنگ و مخلوق نا مال وجان نا رکھ اکن گچین ڈٹ بندی  و گام گیج آتے پک کننگ مریک۔