برطانیہ ٹی رہینگوک پاکستانی تے مون تروک ویل آتا ایسری کن دمدستی گام گیج کننگ نا گرج ءِ، چیئرمین سینیٹ نا برطانیہ ٹی پاکستانی ہائی کمشنر تون گپ وتران

اسلام آباد۔ 28 اگست (اے پی پی) چیئرمین سینیٹ محمد صادق سنجرانی پارینے کہ برطانیہ ٹی رہینگوک آپاکستانیک ہڑتوم آملک آتا نیام اٹ اسہ پول اسے نا کڑد ءِ ادا کننگ اٹی ءُ، برطانیہ ٹی رہینگوک آ پاکستانی تے مون تروک ویل آتا ایسری کن دمدستی گام گیج کننگ نا گرج ءِ۔ داخیال آتا درشانی ءِ او برطانیہ ٹی تعینات پاکستانی ہائی کمشنر ڈاکٹر محمد فیصل تون گپ وتران کرسا کرے ہرا دوشنبے نادے آپارلیمنٹ ہاؤس اٹی اوڑتون اوڑدہی کرے۔ چیئرمین سینیٹ ڈاکٹر فیصل ءِ پوسکن آ زمواری تے سنبھالنگ آ مبارکبادی تس۔ اوڈاکٹر فیصل کن نیک است خواہی نا درشانی ءِ کرے و اومیت ظاہر کرے کہ اونا بطور پاکستانی ہائی کمشنر خذمت آتیان پاکستان و برطانیہ نا ہڑتوم آ کنڈآتا تعلقداری پین گچین مریک۔ چیئرمین سینیٹ ڈاکٹر فیصل ءِ چاگڑد، واپار، آئی ٹی، تعلیم نا بشخ اٹی برطانیہ تون کمکاری ءِ پین مون آ دننگ نا بابت پارت کرے۔ اوپارے کہ برطانیہ نا پوریاگرآک پاکستان اٹ زرکاری کننگ کن بایدے گام گیج کیر۔ زرکارآتا پت زرگزران نا سوگوی ٹی کمکار مریک۔ چیئرمین سینیٹ پارے کہ کاروباری و زرگزرانی رابطہ ہڑتوم آ ملک آتا الس  ءِ پین خڑک اتنگ اٹ کمکار مریک۔ برطانیہ ٹی رہینگوک پاکستانیک ہڑتوم آ ملک آتا نیام اٹ اسہ پول اسےنا کڑد ءِ ادا کننگ ءُ، برطانیہ ٹی رہینگوک پاکستانی ءِ مون تروک ویل آتا ایسری کن دمدستی گام گیج کننگ نا گرج ءِ۔ اومیت ءِ نی تینا زمواری تے جوانی اٹ پورو کیسہ۔