نگراں بنجائی وزیر حوالکاری و شینکاری تون مولانا طاہر اشرفی نا اوڑدہی

اسلام آباد۔ 25 اگست (اے پی پی) نگراں بنجائی وزیر حوالکاری و شینکاری مرتضیٰ سولنگی تون پاکستان علماکونسل نا چیئرمین مولانا طاہر اشرفی جمعہ نادے آ داڑے اوڑدہی کرے و اودے نگراں بنجائی وزیر حوالکاری نا زمواری تے سنبھالنگ آ مبارکبادی تس۔ اوڑدہی ٹی نگراں بنجائی وزیر حوالکاری مرتضیٰ سولنگی تون مولانا طاہر اشرفی سانحہ جڑانوالہ نا بابت گپ وتران کرے۔ داوخت آ گپ وتران کرسا مرتضیٰ سولنگی پارے کہ نگراں وزیراعظم جڑانوالہ واقعہ نا ترندی اٹ مذمت ءِ کرینے، داوڑنا رویہ غاتے سگپنہ، زہمی گرجاگھر و زہمی شاری تا ہند آتا تفنگ و بحالی نا عمل برجاءِ۔ نگراں حکومت آئین و کانود نا رداٹ غٹ شاری تا حق انا رکھ و مون آ دننگ آ یخین تخک۔ اوپارے کہ ہچ کس ءِ انتہاپسندی و لاقانودیت ناخاخر ءِ لگفنگ کن الیپنہ۔ اقلیت خاص وڑاٹ مسیحک پاکستان نا جوڑ کننگ اٹ اہم کڑد ادا کریر۔ طاہر اشرفی پارے کہ سانحہ جڑانوالہ ٹی اوار بندغ آتا برخلاف دمدستی کانودی کارروائی آ نگراں وزیراعظم انوارالحق کاکڑ ءِ خراج تحسین پیش کینہ۔ اوپارے کہ نگراں وزیراعلیٰ پنجاب سید محسن نقوی نا دمدستی گام گیج ستاکڑزک۔