وزیراعظم سمندر پار پاکستانی تا راجی آسودہی کن تندہی اٹ کاریم کننگ ناپارت کرینے، ترجمان دفترخارجہ

اسلام آباد۔ 25 اگست (اے پی پی) دفترخارجہ نا ترجمان ممتاز زہرہ بلوچ پارینے کہ وزیراعظم انوارالحق کاکڑ وزارت خارجہ و پاکستان نا خارجہ مشن تے پارت کرینے کہ او سمندر پار پاکستانی تا راجی آسودہی کن تندہی اٹ کاریم کیر۔ ترجمان جمعہ نادے آ  داڑے پریس حوال اٹی پارے کہ وزیراعظم تدوک آ دے وزارت خارجہ نا دورہ ءِ کرے ہراڑے اودے پاکستان نا خارجہ پالیسی آ حوال تننگا۔ اوپارے کہ حوال اٹی پاکستان نا پیشن نا تعلقداری تا غٹ پلو ، وزارت خارجہ نا کاریم، چندی ڈیہہ و ملک آتون تعلقداری تے سوگو کننگ نا ساڑی کوشست و آخبت نا اولیت آتا احاطہ ءِ کننگا۔ وزیراعظم ءِ وزارت خارجہ و پیشن ناملک پاکستانی مشن تا کنڈآن پیشن نا ملک کاریم کروک آ و رہینگوک آپاکستانی تا آسراتی کن کروک آ گام گیج آتیان معلومدار کننگا۔ ترجمان پارے کہ وزیراعظم اسہ متحرک خارجہ پالیسی و مچ آ دنیا نا ملک آتون واپار، زرکاری، اقتصادی سفارت کاری، رابطہ و السی سفارت کاری نا بابت پاکستان نا تعلقداری تے سوگو کننگ کن تینا وژن نا اشتراک کرے۔ اووزارت خارجہ و پاکستانی خارجہ مشن تے پارت کرے کہ او سمندر پار پاکستانی تا راجی آسودہی کن تندہی اٹ کاریم کیر۔