اسلام آباد۔ 25 اگست (اے پی پی) مسلم لیگ (ن) بروک آ لس گچین کاری تیکن پارٹی نا کنڈآن سلاہ تے الیکشن کمیشن ءِ پیش کرینے۔ جمعہ نادے آ مسلم لیگ (ن) نا سیکرٹری جنرل احسن اقبال نا کماشی ٹی ڈل الیکشن کمیشن اٹ پیش مرسا تینا سلاہ تے پیش کرے۔ داوخت آ مسلم لیگ (ن) نا ڈل اٹی سیکرٹری جنرل احسن اقبال آن بیدس سینیٹر اعظم نذیر تارڑ ، مسلم لیگ ن پنجاب نا صدر رانا ثناء اللہ، مسکوہی وزیر کانود زاہد حامد و مسلم لیگ (ن) ڈپٹی سیکرٹری جنرل عطاء اللہ تارڑ ئسک ساڑی ئسر۔ الیکشن کمیشن اٹ پیش مننگ آن مست مسلم لیگ (ن) نا ڈل اسہ ایلو تون سلابت کرے و الیکشن کمیشن اٹ پیش کننگ کن سلاہ و سوج آتے گڈیکو دروشم اس تس۔ الیکشن کمیشن اٹ سلاہ و سوج پیش کننگ آن پد مسلم لیگ (ن) نا ڈل انا سروک احسن اقبال میڈیا نا نمائندہ غاتون گپ وتران کرسا پارے کہ الیکشن کمیشن ءِ نن گچین کاری حلقہ بندی تا عمل ءِ ترند کننگ نا سلاہ تسونن و داخواست کرینن کہ الیکشن اٹ پیسہ نا برخلاف ضابطہ استعمال ءِ توننگ کن گچین ضابطہ اخلاق اس مرتب کننگے۔ الیکشن کمیشن دا رداٹ باوری کرفینے کہ گچین کاری خڑچ آتے کنٹرول اٹ تخنگ کن المی گام گیج کننگک، ننے پاننگانے کہ الیکشن کمیشن نا کنڈآن گچین کاری تا مانیٹرنگ و نتیجہ غاتے مرتب کننگ کن خودکار نظام اس جوڑ کننگک۔ احسن اقبال پارے کہ نن الیکشن کمیشن آ زور شاغانن کہ زیات آن زیات زالبول ووٹر آتا رجسٹریشن و اوفتا وونٹ کاسٹ کننگ نا بابت ہم گام گیج کننگے۔ اوپارے کہ ننے اومیت ءِ کہ الیکشن کمیشن گچین کاری تے زوت آن زوت کرفنگ نافرض سرایتک، نن خوانہ کہ زوت آن زوت گچین حکومت قائم مرے۔
