اسلام آباد۔ 25 اگست (اے پی پی) انسپکٹر جنرل نیشنل ہائی ویز اینڈ موٹروے پولیس سلطان علی خواجہ موٹروے ایم فور آ خطرناک مواد آن پُر گاڈی نا ساڑی آ شکست نا سخت نوٹس ءِ ہلسا اوگرا کانود نا برخلاف آتش گیر مواد دروک آ گاڈی تا موٹروے آ داخلہ غا پورو پابندی عائد کرینے۔ ترجمان موٹروے پولیس نا کنڈآن جمعہ نادے آ جاری بیان نا رداٹ آئی جی سلطان علی خواجہ موٹروے پولیس نا دنگ اٹ بروک آ شاہراہ تیا سیفٹی پروٹوکولز نا تعمیل ءِ المی گوندانے و اوگراسیفٹی پروٹوکول آن بیدس آتش گیر مواد دروک آ گاڈی تا برخلاف کانودی کارروائی کننگ نا پارت جاری کرینے۔ آئی جی سلطان علی خواجہ پارت کرے کہ اوگرا ایس اوپیز و کانود آ عملدرآمد ءِ ہرحال اٹ پک کننگے۔ اوڈیور، ٹرانسپورٹ کمپنی و الس اٹ ہم آگاہی فراوان کننگ نا پارت کرے۔ آئی جی موٹروے پولیس سختی اٹ پارت کرینے کہ ٹول پلازہ غاتیا اوگرا ایس او پی تے نماں وڑاٹ آویزاں کننگے۔ ایف ڈبلیو او نا کمک اٹ آگاہی مہم کن اسکرین بورڈ آ کلہو آتے ہم خلنگے۔ آئی جی موٹروے پولیس پارے کہ خطرناک مواد نا ات و در کن غیرموزوں گاڈی نا کاریم اٹ اتنگ زند ءِ خطرہ ٹی شاغنگ نا غٹ آن بھلا سوب ءِ، خطرناک آتش گیر مواد آتا ات و در کن بھاز احتیاط نا گرج ءِ۔
